March 01, 2017
Momi tarutaru nga rangatahi
Momi tarutaru nga rangatahi
Tera pea he wahanga o te korero a te peremia a Bill English e tika ana. Koira taa te Minita Whakawhanake Maori taa Te Ururoa Flavell, whai muri iho i te whakatau a te peremia, ko tetahi o nga take nui e kore mahi nei aa tatou rangatahi, na te mea, he whakatipuranga momi tarutaru ratou. Tokomaha nga taangata e whakahee ana i taua korero a English, engari, hei taa Flavell, tokomaha nga tumuaki mahi i roto i te rangai poro rakau kua kii atu ki a ia, ko te momi tarutaru a nga kaimahi tetahi raru nui mo ratou.
Papa whakatipu hua kiwi i Te Matau-a-Maui
Kua hoko te Tarahiti o Ngai Tukairangi o Tauranga moana i nga papa whakatipu hua kiwi e rima i Te Matau-a-Maui, e wha tekau miriona taara te utu. Hei taa te Upoko o Ngati Kahungunu a Ngahiwi Tomoana, i watea nga hapu o Ngati Kahungunu ki te hoko, engari, auare ake. I ookawa nei te tukutanga o aua papa e rima ki a Tukairangi i te marae o Omahu i Heretaunga inanahi.
Maoriland Film Festival
Ka tu te ahurei kiriata Maori e kiia nei ko te Maoriland Film Festival ki Otaki i tenei marama, ara, hei te tekau am rima ki te tekau ma iwa. Hei taa Tainui Stephens, kua tino tipu te ahurei nei i roto i nga tau, a, he ara tenei e puta ai i te tangata whenua aa tatou korero ki te whai ao, ki te ao marama.
1.9 miriona taara mo Te Wharekura o Te Rau Aroha
Kei te whakapaua e te Kawanatanga te kotahi ira kati ono miriona taara kia tuu nga akomanga hou e wha ki te Te Wharekura o Te Rau Aroha i Matamata. Hei taa te Minita Tuarua i nga take Matauranga a Nikki Kaye, mai ra ano i tona oro timtanga i te tau 2009 kua tino piki te tokomaha o nga tauira o te kura.
Copyright © 2017, UMA Broadcasting Ltd: www.waateanews.com