March 05, 2017
Ngai Tukairangi te hoko papa whakatipu hua kiwi
Ngai Tukairangi te hoko papa whakatipu hua kiwi
Hei taa te hapuu o Ngai Tukairangi, te hapu no Tauranga i hoko ai i nga papa whakatipu hua kiwi e rima i Te Matau-a-Maui i tera wiki mo te wha tekau miriona taara, ko taua hoko te tohu o to ratou pumautanga ki te rangai hua kiwi hei oranga mo o ratou uri. Hei taa Neil Te Kani, mangai mo te Tarahiti o Ngai Tukairangi, kua roa ratou e mahi ana i roto i te rangai hua kiwi. Hei taana ano, ka nui te mihi ki a Ngati Kahungunu, i taa ratou whakaae kia hoko whenua a Ngai Tukairangi ki roto i te rohe o Te Matau-a-Maui.
Te pire whakakore Tari Tamaiti Taiohi Whanau
E ai ki te roopu Child Poverty Action Group, e kiko kore noa iho ana te wahanga o te pire Oranga Tamariki e kii ana, ka puta he hua ki nga tamariki whakaraerae Maori. No te waenganui po o te po mere i mutu ai te wa tapae korero mo te pire. Koia te pire e whakakore ana i te Tari Tamaiti Taiohi Whanau, kia tuu ai he Manatu Tamariki Whakaraerae. Hei taa Ahorangi Maataamuri Mike O’Brien, mangai mo te Child Poverty Action Group, tokomaha nga roopu Maori e whakahee ana i te pire.
Whakahee a Peters kia hiki te pakeketanga ritaia
Hei taa Winston Peters, kaiarahi i a Aotearoa Tuatahi, tino kore rawa atu nei ia e tautoko i a Nahinara, mena ka hiki ratou i te pakeketanga mo te riitaia i te mahi, i te ono tekau ma rima tau ki te ono tekau ma whitu tau. I te korero te peremia a Bill English mo te whakapiki ake i te pakeketanga riitaia i nga rangi whakataa nei.
Uukuia te ingoa Duncan Macintyre i te Ipu Whakaihuwaka
E kore a Duncan Macintyre, Minita o mua i nga Take Maori, e whakahee i te whakaaro kia uukuia tona ingoa i te Ipu Whakaihuwaka o Te Matatini. Koira taa te heketari a McIntyre i nga tau o mua, taa Neville Baker. Kua mate noa atu a McIntyre, a, na te kaiarahi takirua i te RTM, na Marama Fox te whakaaro kia panoni i te ingoa o te Ipu Whakaihuwaka i whakarewa ake i muri i te mutunga o te whakatatae i tenei tau.
Lance O'Sullivan hei tauira kaihau
Kua tohua a Takuta Lance O’Sullivan o Kaitaia, hei tauira kaihau, ara, distinguished alumni o te Whare Wananga o Tamaki Makaurau. Hei taana, ko te hua nui o te kopoutanga oona ki taua momo taumata, ko te kite a nga tauira Maori o te wa nei, ara nga ikeikenga o te ao matauranga ka taea e ratou te piki, ina hoki te korero, iti rearea, teitei kahikatea ka taea.
Kaiarahi tuarua hou mo Reipa
Hei taa te mangai torangapu mo Tamaki Makaurau a Peeni Henare, no Reipa, kaore e kore ka whakatumatuma te kaiarahi tuarua hou i te roopu, a Jacinda Ardern, ki te kokiri i nga take Maori. Hei taa Henare, kua mahi tahi raua ko Ardern i roto i te whare paaremata i nga tau nei, a, he pukumahi, he atamai, a, e ngakau tuwhera ana ki nga take Maori.
Whakaae nga taapoi Pakeha ki Rangitoto
E whai whakaaro ana te Tarahiti o Ngai Tai ki Tamaki ki te wero i te whakatau a te Kooti Teitei, i whakaae nei kia haere nga taapoi Pakeha ki te moutere o Rangitoto. ko te hiahia o Ngai Tai, ma ratou anake nga taapoi ki runga i te moutere o Rangitoto e whakahaere. Hei taa James Brown, mangai mo Ngai Tai, kei te matangurunguru ratou ki te whakatau a te kooti. No te tau rua mano tekau ma rima i waitohua ai e Ngai Tai taa ratou whakataunga, engari, kaore ano kia mana noa.
Copyright © 2017, UMA Broadcasting Ltd: www.waateanews.com