March 07, 2017
ASB Polyfest
ASB Polyfest
Ka timata te ahurei nui o te ASB Polyfest hei enei ra tata nei. Hei taa te kahika o Tamaki a Phil Goff, kaore he hui i tua atu i te Polyfest hei whakaatu ma Tamaki i te ahurea taketake o tenei whenua, ara, i te ahurea Maori, tae atu ki nga ahurea whaanui katoa o nga iwi huhua e noho ana ki Tamaki.
Te ra whakanui i nga waahine
Koinei te ra whakanui i nga waahine, puta noa i te ao, na whai ano kua puta nei i te roopu waahine Maori Toko i te Ora he taauaaki e akiaki ana i a tatou kia ata whai whakaaro ki nga kaupapa e whakahawea ana i te hunga wahine. Hei taa ratou, ahakoa te pai o Aotearoa i nga tau kua hipa, ki te hapai i te mana o nga waahine, i enei ra nei, kaore nga waahine i te tino kitea i nga turanga ikeike, turanga whai mana ranei, kaore hoki nga waahine i te whai i te utu a nga tane, ahakoa e orite ana te mahi.
Te pire motuhake a Jan Logie
Ka horahia atu te pire motuhake a Jan Logie o Nga Kakariki ki te whare paaremata a te ahiahi nei, a, kua tahuri a Nahinara ki te tautoko i te pire, no reira, kaore e kore ka puta i tana panuitanga tuatahi. Ko taa te pire a Logie, me watea nga paarurenga o te ringa patu i roto i nga whanau, i te mahi mo te tekau raa. Kei te tautoko hoki te RTM i te pire nei.
Emotional intelligence ki te marautanga o nga kura
Kei te whakamanuhiri a Marama Fox, kaiarahi takirua i te RTM, i etahi kaimahi mate whakammomori ki Te Whanganui-a-Tara i te ra nei. Ko to ratou hiahia kia uru te matauranga kare-a-roto, ara, emotional intelligence, ki te marautanga o nga kura o Aotearoa nei. Hei taa ratou ma te whakauu i tera kaupapa ki nga kura, ka heke nga tatauranga mate whakamomori i waenganui i a tatou.
Te matenga o George Michael
Kua puta te whakatau i te matanga tupapaku i Ingarangi, i mate tara-a-whare noa iho nei a George Michael, kaiwaiata rongonui, i te ra kirihimete i tera tau. Hei taa te matanga tupapaku, mai ra ano tetahi mate e noho huna ana ki te manawa o Michael, a, koira te take i mate ai ia, no reira, kaore he take o te whakatewhatewha tonu i tona matenga. E rima tekau ma ono nga tau o Michael, ka mate nei.
Heke te taipakeketanga mo te pooti ki te 16
E tautoko ana te mangai torangapu o Manurewa a Louisa Wall i te karanga a te Komihana Tamariki, a Kaiwhakawaa Andrew Becroft, kia heke te taipakeketanga mo te pooti ki te tekau ma ono nga tau. Hei taana, torutoru noa iho nga rangatahi e pooti ana i tenei wa nei, a, ma te tuku i te mana pooti ki nga taiohi tekau ma ono tau te pakeke, tera pea ka hihiri ake o ratou ngakau ki te aruaru i nga take torangapu o te wa.
Hui te Paati Maori ki a Nick Smith
Kua hui te RTM ki te Minita i nga take Taiao ki a Nick Smith, a, hei taa Te Ururoa Flavell, kaiarahi takirua i te RTM, ka pakari ake te tuu a nga iwi i raro i nga panonitanga ki te ture whakahaere rawa. Hei taana, ka tautoko ratou i te putanga o te pire i tana panuitanga tuatahi i te whare paaremata, i runga i te whakapono, he painga ka petapeta mai ki a tatou o te ao Maori.
Te maina o nga onepu i te tonga o Taranaki
Katahi te whakahihi, katahi te whakatuanui. Koira taa Debbie Ngarewa Packer o Ngati Ruanui ki te ahua o te umanga Trans Tasman Resources, otira, ki te ahua tonu o aa ratou whakapaanga atu ki te iwi mo te maina i nga onepu kohuke i te takutai moana i te tonga o Taranaki. Hei taa Packer, kua noho ratou ki te korero ki te hia nei umanga i roto i nga tau nei, engari, ko Trans Tasman te umanga tino kino rawa atu o te katoa.
Whakahaere hui te Tarahiti o Ngati Haua
Kei te whakahaere hui te Tarahiti o Ngati Haua i Taumarunui, ki te whakatakoto korero ki nga uri, mei kore ratou e rata ki te whakaaro o te Tarahiti, ma te Tarahiti tonu te tono tiriti mo nga whenua e karapoti ana i te maataapuna o te awa o Whanganui e amo ake. Ko te hapu o Ngati Haua tetahi i whai waahi ki te whakataunga mo te awa o Whanganui. Hei taa te toihau takirua o te Tarahiti, a Terehia Hall, hei te po mere nei ka tuu te hui tuatahi ki te Novotel i te taunga waka rererangi o Tamaki, ki Te Whare Wananga o Aotearoa i Kirikiriroa hei te ahiahi o te ra horoi me te marae o Ngapuwaiwaha i Taumarunui hei te ata o te ra tapu.
Copyright © 2017, UMA Broadcasting Ltd: www.waateanews.com