July 16, 2017
Taiohi Ararau he hootaka rangatahi hou
Taiohi Ararau he hootaka rangatahi hou
Waru miriona taaraa te rahi o te puutea kua whakaritea e te roopuu toorangapu Maaori hei haapai i te hunga rangatahi. Ko Taiohi Ararau, ara 'Passport to life' te ingoa o te kaupapa nei, kei Te Ururoa Flavell, minita whakawhanake Maori ngaa whakamaarama.
Ka anga pehea a Aotearoa Tuatahi
Ki te tauawhitia a Aotearoa Tuatahi ki roto i te Kawanatanga hou, ka whakakorengia e ratou nga turu torangapu Maori e whitu katoa. Koira te kii taurangi a Winston Peters, kaiarahi i Aotearoa Tuatahi, i taa ratou hui i Tamaki inanahi. Hei taana, kaore e tika ana kia whai turu motuhake te iwi Maori i roto i te whare paaremata, a, tukuna ma te motu e whakatau mena ka puritia tonutia aua tuuru. Nei raa nga whakaaro o Shane Taurima o te paati Maori.
Ehara i te mea ko te maori anake
Kua tahuri etahi Pakeha ki te tautoko i nga iwi o Tauranga Moana i roto i taa ratou whawhai ki nga iwi o Pare Hauraki mo te mana whenua, mana moana o Tauranga. Tokomaha nga Pakeha i hono ki nga iwi o Tauranga ki te hikoi i te arahanga o Te Wairoa ki te whakahee i te tono a nga iwi o Hauraki kia whai mana ratou ki nga rohe o Tauranga, pera i te moutere o Matakana. Hei taa te mangai mo nga iwi o Tauranga, a Charlie Tawhiao, e tika ana kia tautokohia ratou e nga Pakeha, i te mea, ki te muuhore ratou, ka muuhore hoki nga Pakeha o Tauranga.
He aitua, he aitua kua hinga a Cliff Whiting
Kua hinga tetahi o nga tohunga toi o te motu, a Cliff Whiting. I mate ia ki Whangarei i nga rangi whakataa nei. No Te Whanau Apanui a Whiting, a, koia tetahi i wero i nga whakapono toi Maori i roto i te auahatanga o aana mahi. Nana te marae i Te Papa i Te Whanganui-a-Tara i hoahoa, i whakairo. Hei taa te Kaihautu o Te Papa Tongarewa a Arapata Hakiwai, he matakite a Cliff Whiting i kite i te anamata o te mahi toi Maori, otira o te whakairo.
He hiikoi motuhake mo ngaa maori katoa
E tono ana a Shane Taurima, kaitono ma te paati Maori i te turu o Tamaki, kia kotahi nga roopu torangapu katoa ki te tautoko i te hikoi 'Not One More Death', whai muri iho i te matenga o nga taangata kainga kore e toru i nga huarahi o Tamaki i te wiki kotahi nei. Kia tahuri ake tatou.
Te penihana whaanau o ngaa Kaakaariki
I whakarewahia e te roopu Kakariki taa ratou kaupapa-a-whanau i taa ratou hui-a-tau i Tamaki i nga rangi whakataa nei. Ko te ngako o tenei kaupapa a ratou, kia 20 te pikinga o te uara o te penihana whanau, me te utu paeraro, ara, te minimum wage. Hei taa te kaiarahi i Nga Kakariki, a Metiria Turei, rima rau mano whanau ka whai hua i tenei kaupapa a ratou.
Copyright © 2017, UMA Broadcasting Ltd: www.waateanews.com