July 24, 2017
Jones mo Aotearoa Tuatahi
Jones mo Aotearoa Tuatahi
E ai ki te kaitono ma Aotearoa Tuatahi i te turu torangapu o Whangarei a Shane Jones, kaore e tika ana kia tautoko tatou i tetahi huinga keenge, pera i te kaupapa mekemeke i whakahaerehia ai i waenganui i nga keenge Mangu Kaha, Mangaru, Head Hunters me nga Stormtroopers i nga rangi tata nei. Hei taa Jones, kei te hoko P tonu aua keenge ki aa tatou rangatahi me o tatou whanau.
Tamati mo te Roopu Torangapu Maori
E ai ki te kaitono ma te RTM i te turu o Te Tai Hauauru a Howie Tamati, me arotake i te penihana kaumaatua. I tenei wa, me eke ki te ono tekau ma rima tau katahi ano koe ka whai i te penihana kaumatua, heoi, e ai ki a Nahinara ka piki tera ki te ono tekau ma whitu tau mena ka kawanatanga ano ratou. Hei taa Howie Tamati, ka raru te Maori i te pikinga o taua pakeketanga, i te mea, kaore e pera rawa ana te ora roa o te nuinga o tatou.
Tono raupatu a Ngati Maniapoto
E ahu ana a Ngati Maniapoto ki te ra e waitohua ai he whakaaetanga ki te Karauna e tau ai taa ratou tono raupatu. Hei taa te kaiarahi i te tono raupatu a Maniapoto, a Nanaia Mahuta, kei te whakahaerehia nga hui whakamutunga ki nga hapu o Maniapoto i tenei wa tonu nei, a, hei te tuaono o Hereturikoka ka tutuki aua hui. Hei taana, kei te tautoko te nuinga o nga hapu i nga whakaritenga o te whakaaetanga.
Te rarangi ingoa Maori
E akiaki ana te Tarahiti o Te Whanau o Waipareira kia whakawhiti nga Maori i te rarangi ingoa auraki ki te rarangi ingoa Maori. A tera tau ka whai waahi te Maori ki te whakawhiti, a, hei taa te tahuhu rangapu o Waipareira a John Tamihere, ka kaha taa ratou whakatairanga i te kaupapa e whaaiti ai te Maori ki te rarangi ingoa Maori. Hei taana, ma reira, ka whai kaha tatou i roto i nga whakatau torangapu o te wa.
Kaitorangapu Maori o Reipa
Kei te whakarewa nga kaitorangapu Maori o Reipa i aa ratou kaupapa pooti hei enei rangi whakataa nei ki runga i te marae nei o Nga Whare Watea. Hei taa te pou arahi i aa ratou kaupapa pooti, a Willie Jackson, kei te rere te powhiri ki te hapori kia haere mai ki Watea ki te tutaki ki nga kaitorangapu Maori o Reipa, ki te patai i waa ratou patai, otira, ki te whakatakoto i waa ratou wero.
Copyright © 2017, UMA Broadcasting Ltd: www.waateanews.com