July 25, 2017
Tuuru Maori i nga Kaunihera-a-rohe
Tuuru Maori i nga Kaunihera-a-rohe
E ai ki te Perehitini o te roopu Nga Kaunihera-a-rohe o Aotearoa, a Lawrence Yule, e whakahotaetae ana etahi wahanga o nga ture o tenei whenua i te whakatuunga mai o nga tuuru Maori ki runga i nga Kaunihera-a-rohe, a, he wahanga era e tika ana kia panonitia, i te mea, e taami ana i nga tika o te Maori. E ai ki nga ture me maatua whakahaere pooti mena ka tuu he tuuru Maori. E heke ana a Yule i tona turanga perehitini hei nga wiki tata nei, engari, hei taana, i mua i tana heke, me whakauu e ia etahi mangai Maori ki te roopu Nga Kaunihera-a-rohe o Aotearoa.
Ruarua nga kaiako ki Tamaki Makaurau
Kaore ano kia penei rawa te ruarua o nga kaiako ki Tamaki Makaurau mo te rua tekau tau. E ai ki te rangahau a Te Riu Roa, o nga kaiako wha rau, rima tekau o te rohe o Tamaki i uiauiatia ra e ratou, he haurua o era kaiako e whai whakaaro ana ki te wehe atu i Tamaki, rima tekau ma whitu o ratou kei te wehe. E ai ki Te Riu Roa, ko te nui o te utu mo te noho ki Tamaki te take nui e wehe atu nei nga kaiako i Tamaki ki nga rohe.
Goff e whakahee ana ki a Peters
Kei te whakahee te kahika o Tamaki a Phil Goff i te karanga a Aotearoa Tuatahi kia pootihia e te motu te oranga tonutanga o nga turu torangapu Maori. Hei taa Phil Goff, ko te mate ke o taua karanga a Winston Peters, e aro nui ke ana ki nga Maori ki te rarangi pooti auaraki, engari, ma nga Maori kei te rarangi pooti Maori ke te oranga tonutanga o aua tuuru e pooti, kaua ma era atu.
Para Kore nga marae o Ngati Kahungunu
E whai ana nga marae katoa o Ngati Kahungunu kia Para Kore ratou. Hei taa Tyne Marie Nelson, mangai mo te kaupapa nei, kei te hiwa haere nga marae ki nga hua ka puta ki te taiao i te kaupapa para kore. Hei taana, i whakatairangatia te kaupapa i Te Matatini, a, mai i taua wa ki naianaei, he maha nga marae kua hono ki te kaupapa.
Hono te Paati Maori me One Pacific
E ai ki te kaiarahi o mua i te roopu Mana Motuhake, minita o mua hoki i nga take taiao, a Sandra Lee, e atamai ana te whakaaro kia hono te RTM me One Pacific. Hei taana ko nga take e hangai ana ki te iwi Maori, e rite tahi ana ki nga take e hangai ana ki nga iwi moutere, ara, ko te kore mahi, ko te kore whare, ko te poharatanga.
Copyright © 2017, UMA Broadcasting Ltd: www.waateanews.com