July 27, 2017
Te kiriata Waru
Te kiriata Waru
Kua whai putea nga waahine Maori e waru hei whakaoti i taa ratou kiriata e kiia nei ko Waru. Na Te Mangai Paho, Te Komihana Kiriata o Aotearoa me Irirangi te motu te putea tautoko. Ko te wahine Maori whakamutunga ki te hanga kiriata, ko Merata Mita me taana kiriata Mauri, e rua tekau ma tahi tau ki muri. Ko te kaupapa o te kiriata Waru, ko nga paanga e waru ki tetahi whanau, i te matenga o tetahi pepi i waenganui i a ratou.
He utu ta Turei no nga wa o mua
Kua puta te whakahau i te Uniana Kaiutu Taake o Aotearoa kia whakahoki a Metiria Turei i te putea i tahaengia ra e ia i te Tari Whakahiato Ora, i a ia e whiwhi ana i te penihana i nga wa o mua. Hei taa te Upoko o te Uniana, a Jordan Williams, kua tatau ratou, a, hei taa ratou e rima tekau ma whitu mano taara te nui o te putea hei whakahoki ma Turei ki te Tari Whakahiato Ora.
Te hui Matariki X
Ka muia a Rotorua hei enei rangi whakataa nei, ko te kaupapa, ko te hui Matariki X e whakahaerehia nei e Callaghan Innovation. Hei taa Vinnie Campbell, mangai mo te hui nei, i tua atu i te tini, kotahi rau rangatahi Maori kua powhiritia e ratou kia tae ki te hui ki te whakarongo ki nga korero mo te ao matihiko me nga whakaaro auaha e whanake ai, e angitu ai te Maori i roto i taua rangai.
Te Reo Maori ki roto paaremata
Kua tae ki te wa e ritaia ai a Winston Peters i nga mahi i te whare paaremata. Koira taa te kaiarahi i a Mana taa Hone Harawira. Hei taa Harawira, ka nui tana tautoko i te whakamahinga o te reo Maori i roto i te whare paaremata, otira, i te kaha o te Minita Whakawhanake Maori o Te Ururoa Flavell ki te whakautu i nga patai ki te reo Maori anake. I amuamu a Peters mo tera mahi a Flavell, engari, hei taa Harawira, no te ao tawhito a Peters me ona whakaaro.
Copyright © 2017, UMA Broadcasting Ltd: www.waateanews.com