August 09, 2017
Riihaina a Metiria Turei
Riihaina a Metiria Turei
Kua riihaina a Metiria Turei hei kaiarahi i te roopu Kakariki, engari, ka whakataetae tonu ia i te turu o Te Tai Tonga kia whai ai nga Kakariki i te pooti-a-roopu. Katahi ano nga rangahau hou a Newshub kia puta, a, hei taa ratou, kua heke te tautoko ki nga Kakariki, na runga ano i nga raru kua paa ki Turei, i te tekau ma toru oorau ki te waru ira kati toru oorau. Kua piki a Reipa ma te iwa oorau ki te toru tekau ma toru oorau o te tautoko i raro i te mana o to ratou kaiarahi hou o Jacinda Ardern. Ko te korero mo te RTM, kua piki ma te haurua oorau ki te tahi ira kati rima oorau o te tautoko.
Wendy Biddle turu auraki o Rotorua
Heoi, kua tohua e te RTM a Wendy Biddle hei mangai mo ratou ki te turu auraki o Rotorua. Kei te hapori o Te Koutu a ia e noho ana, a, koia tetahi o nga pou whakahaere i te tari o te kohanga reo. Hei taa te Perehitini o te RTM, a Tukoroirangi Morgan, kei te whakaaro nui te marea ki a Wendy Biddle, na runga i tona kaha ki te awhina i te hapori, otira, i te hunga kainga kore me te hunga tuakoka.
Te Reo Maori ki nga kura katoa
Me mahi tahi nga roopu torangapu ki te whakangungu i nga kaiako kia mohio ai ratou ki te whakaako i te reo Maori. Koira te wawata o te Upoko o Te Putahi-a-Toi i te whare wananga o Te Kunenga ki Purehuroa, ara, o Ahorangi Meihana Durie. Hei taana, mena e whai whakaaro ana tatou ki te whakauu te reo Maori ki nga kura katoa, me mohio nga kaiako ki te reo, me ranea hoki nga rauemi hei whakamahi ma ratou.
Te Kaunihera Maori
Kua mimiti te kaha me te mana o te Kaunihera Maori ki te korero mo te iwi Maori whaanui, i te tohe i waenganui i a Maanu Paul raua ko Taihaakurei Durie mo te toihautanga o te Kaunihera. Koira taa Felix Geiringer, roia ma te kaunihera Maori. Hei taana, i whakatiitaha tenei tohe i waenganui i enei rangatira e rua, i te whai a te Kaunihera kia tuu ano hei roopu whai mana nui ki te korero mo te iwi Maori nui tonu.
Nga whenua o te rohe o Hauraki
Kua tukuna he petihana ki te Whare Paaremata e tono ana i te Kawanatanga kia tawharau nga whenua o te rohe o Hauraki kei raro i Te Papa Atawhai, i nga umanga maina. Na te taenga atu o te Umanga New Talisman Gold Mines ki te keri haere i te whenua i waenganui i a Paeroa me Waihi i whanau mai ai te petihana nei. Hei taa nga iwi o Hauraki i tautoko i te petihana, he whenua tapu o ratou whenua, me mutu te tukinohia e nga umanga maina.
Te whakataetae Pikihuia
Neke atu i te kotahi rau, toru tekau ringa tuhi pukapuka Maori kua uru ki te whakataetae Pikihuia i tenei tau. Hei te tuawhitu o Mahuru ka panuitia mai nga toa. Hei taa Whiti Hereaka, kaiwhakawaa i te tuhinga paki poto ki te reo Pakeha, miharo ana te hohonu o nga puukenga tuhi a tena, a tena. Hei taa te kaiwhakawaa i nga tuhinga ki te reo Maori, a Poia Rewi, a, he maha nga kaupapa i tuhia ai, mai i te ru whenua, ki te whutuporo, ki nga mahi ki runga i te marae aatea.
Copyright © 2017, UMA Broadcasting Ltd: www.waateanews.com