October 07, 2015
Hui waahine.
Hui waahine.
E tika ana me whai waahi te Roopu Waahine Toko i te Ora ki te whakatupu i nga take paapori.
Koia te hiahia o te Prue Kapua peretini o te roopu raa i te timatanga o taa ratou hui a tau i te raa nei.
Hai taana e piripono ana ratou ki te hiahia kia whai reo nga waahine Maori huri noa me o ratou whaanau.
Ki a ia ano ko te wero kia kitea a kanohi te Roopu Waahine Toko i te Ora a nga tau e tuu mai nei.
Te Aute puutea tautoko.
E tika ana me whakapiki i te rahi o te puutea tautoko ki te Kaareti o Te Aute ma reira ka ora tonu te kura.
Hai taa Shane Hiha tumuaki o Te Aute rima miriona taara ka hoatu ki te kura i te takanga mai o te whakataunga Tiriti o Waitangi a Heretaunga Tamatea.
Ki taana ano ma te haahi Mihingare me te Tari Maatauranga e rite i taa Heretaunga Tamatea e takoha ai kaatahi ka tatuu nga kaiako mauritau me te maha ake o nga tauira.
Akoranga haangai kore.
Whakahoungia te ahua o nga akoranga whakawhaanau peepee kia tae atu te tokomaha o nga whaea Maori.
Hai taa tapuhi Jean Te Huia o te ratonga hauora o Kahungunu kaahore nga whakahaere i nga akoranga o enei raa e haangai puu ana ki nga hiahia o nga whaea Maori koira te nuinga ka noho kee i te kaainga.
Hai taana ano ko te ahuatanga Maori te taha kei te ngaro.
Pahuu i Poneke.
Kua whakatahia te Whare Waananga o Wikitoria i Poneke na runga i te whakatuma kei reira he pahuu e takoto ana.
Kua tatuu tetahi reta ki nga Piriihimana me te korero i mahue ai taua pahuu ki ro whare ako.
Te whakamomori.
Ka kore nga tatauranga e teka.
E kii ana te Roopu Mate Hinengaro o Aotearoa na runga i nga tatauranga kino kua tukua mai mo te whakamomori me tahuri koohukihuki tatou ki o tatou taiohi kei te rua o te pouritanga e noho ana.
Aapiti atu e mea ana te roopu Reipa kua whakaatu te kaawana he ngoikore a ratou hootaka aarai e paa ana ki taua mate.
Winitana kupu whakahee.
Kei te hee nga kupu whakanui mo te kirimana TPPA na te mea kaahore ano nga tikanga whakahaere kia whakatauhia.
Koia te korero a Winston Peters rangatira o Aotearoa Tuatahi me tana kii kei te kite i te hanga anuanu o te ao oohanga me nga whakaweti a nga kamupene nunui o te ao ki nga whenua iti penei i a tatou.
Copyright © 2015, UMA Broadcasting Ltd: www.waateanews.com