October 08, 2015
Kohanga whakatuuwheratanga whare.
Kohanga whakatuuwheratanga whare.
Akuanei ka tutuki i te moemoea i Ruapootaka Taamaki Makaurau me te Kohanga Reo o Puuau te Moananui a Kiwa ki te whakatuuwhera i to ratou whare hou.
Ka poipoiaa ko nga mokopuna kotahi rau ki reira hai taa Selwyn Austin kaiwhakahaere o te kohanga raa he maha nga taiapa me nga aarai kua raupatuhia e ratou…kia tatuu mai ki te whakatuuwheratanga o nga whare.
Kura hourua, nga otinga ako.
Kaore e aata waananga ana i nga otinga maatauranga o nga kura hourua i tenei waa.
Ahakoa te hiahia o te Tari Maatauranga me nga roopu aapitihana ki te whakarite i aua otinga ki era o nga kura auraki kei te kaupare te Minita a Hekia Parata i tera hiahia.
Ahatia kei te kii te roopu Reipa me whakarite i nga taha e rua ki a raaua ano he aha te raruraru?
Kurii rangahau.
Ma te rangahau i nga tauira ira o te kuri korehaahaa ka tupu te mohiotanga e paa ana ki nga hekenga waka o nga tuupuna ki Aotearoa.
14 nga kuri me o ratou kooiwi i kitea i Wairau i te raki o te Waipounamu kua raupapatia e nga kairangahau.
Hai taa kairangahau Karen Greig hai te roanga o te waa ka mohio ki te ahua o nga hononga o nga kurii ki te tangata, ki te taiao hoki.
Whakapaa mai ki te Maori ka tika.
Tera pera ka mahue ano te Maori ki roto i nga korero mo te raahuitanga o tetahi rohe moana.
Kua tuu ake a Nick Smith Minita Taiao ki te whaaki i te hiahia o Aotearoa ki te kookiri i te whakaritenga o tetahi atu raahui moana i te pito tonga o te ao araa i Antarctica.
Hai taa Matiu Rei tiamana o Te Ohu Kaimoana ka hii ika etahi kamupene Maori ki reira aa ka herea te Karauna ki te korero ki nga iwi me Te Ohu Kaimoana e paa ana ki nga take hao ika katoa.
Kua tau te take.
Ko nga whakapae i takahi ai te Waananga o Aotearoa i nga motika rawa a hinengaro kua whakatahia.
Hai taa toihau Jim Mather kaare he taapaetanga puutea i utua ki te hunga whakapae ki te kaiwhakauu o te Waananga ki a Rongo Weetere raaua ko tana tamaahine a Susan Cullen.
Hai taa Mather ano i toko ake ko nga kaupapa ture i te tau 2006 me te tika o tetahi whakaaetanga i taua waa.
Kua katia te rua waro.
E tika ana me tahuri te kaawanatanga ki te aawhina i a Raahui Pookeka.
Koia te karanga a Nanaia Mahuta mema paaremata o Hauraki Waikato whai muri i te korero a te kaawana ka kati i te rua keri waro i reira na te hokona atu o kamupene Solid Energy.
Hai taa Mahuta he raa pouri mo Raahui Pookeka me tana kii kei hea te mahere a te kaawana ki te whakawhiti i nga haapori kia kore ai ratou e whakawhirinaki atu ki te waro, ki te hauhaa.
Copyright © 2015, UMA Broadcasting Ltd: www.waateanews.com