August 14, 2015
Kaipaamu e oke ana.
Kaipaamu e oke ana.
E rongo ana i te tangi a nga kaiahuwhenua huri noa mo te aawhina.
Koia te korero e rere ana i te taiwhenua na runga i te heke haere o te tohanga puutea a Fonterra ki a ratou.
E whakapae ana kua piki i te wha rau paiheeneti te rahi o nga kaipaamu e rapu aawhina ana.
Kua ngahoro maarika te waariu o nga taputapu miraka i nga marama kua pahure atu nei aa ka nui te riri ki a Fonterra me te hee o a ratou matapae.
Kura hourua
Kua tapahia etahi tohanga puutea ki nga kura hourua.
Kua huri nga tikanga toha puutea kia arotahi ki ia aakonga e kore e tuku i te puutea nui ki nga utu whakauu.
Kei raro i te puunaha hou ka aarai i te utunga o te puutea nui ka aukati hoki i te ahei o nga kura ki te whakangao i te puutea a nga kaiutu taake.
Tohanga puutea whakaora taiao.
Kua tohaina ki te puutea ko etahi roopu taakaro me etahi marae i roto o Waikato.
He tohanga taiao tata ki te 40 mano taara te rahi o te puutea hai hoatutanga ma te Kaunihera a Rohe ki nga hootaka e rua.
E mea ana te hunga tohatoha puutea ka tuku atu i te karere ki te motu he mea whakahirahira rawa atu te oranga o te taiao me nga tikanga hai whakatairanga i taua whakaaro.
Whaanau ora te rongoaa.
Ma nga painga o Whanau Ora ka whakakapi i te peehitanga o nga waahine Maori i Aotearoa.
Koia te whakapae a roia Horiana Irwin Easthope o te Tairaawhiti me tana kii kaahore e orite ana te tuu a te wahine Maori
ki taa te motu whaanui mo te taha ki te mahi, ki te whai maatauranga, ki te hauora.
Hei taana ano kei te kite i nga mahinga pai ki te haapai ake i te wahine Maori ki roto i nga iwi, i nga hapuu, i nga whaanau.
Rawakoretanga
Kia kaha te kaawanatanga ki te whakarite kaupapa ki te whakaruruhau i nga tamariki.
Koia te karanga a nga kairangahau o te Whare Waananga o Otaakou.
Hai taa Taakuta Lisa Te Morenga kei hea nga ture hai whakakore i nga mahi e whakatairanga nei i nga kai raapihi, i nga inu mau huka.
Aapiti atu ki a ia ano tangohia atu nga miihini hoko tiakarete, hoko kai kino e tuu ana i nga hoohipera me nga waahi haapori.
Copyright © 2015, UMA Broadcasting Ltd: www.waateanews.com