August 25, 2015
Oohanga e pai ana?
Oohanga e pai ana?
Ka noho tuuwhera a Aotearoa ki nga raruraru oohanga o te waa engari hai taa te Piriimia he ahua pai to tatou tuuranga ki te whakaritea tatou ki etahi atu whenua.
Hai taa Bill English Minita Take Puutea he aawangawanga noona ki nga kitenga o te waa ki nga maakete oohanga me te heke haere o te waariu o nga taputapu.
Hai taa te Piriimia ano tera tonu pea ka pooturi te tupu oohanga a nga raa e tuu mai nei.
Hootaka patu ahi
E whakarewa ana te Tari Tiinei Ahi i taa ratou hootaka puoho auahi i te waa tonu kua piki haere i te rahi o nga mate kaapura.
E mea ana te tari tokowaru nga mate kaapura i nga marama e rua pahure atu nei i taea te kaupare mehemea he puoho auahi i era waahi.
Hai taa te tari ano horekau he mea hai aarai i nga paanga o te ahi ki nga whare maha i Aotearoa.
He po whakaatu puukenga rotarota.
Ka tuu etahi o nga tino kaitito rotarota Maori ki te tonga o Taamaki a te po nei ki te tautoko i te hootaka Whare Manaaki ma ratou a ratou mahi e whakapuaki.
Hai taa kaiwhakahaere Claudette Hauiti o te roopu noho taone o MUMA he nui nga wheeako me nga puukenga o nga kaiwhakakite, o nga kaituhi katoa ka tuu ake i te whare haapori o MUMA i Papatoetoe.
Kei te tapepe nga korero.
Kei te whakakaahore te Minita Maatauranga a Hekia Parata i nga whakapae ko ia kei te whakarerekee i nga tikanga mo te whakahaere korero e paa ana ki te whakataunga Tiriti o Waitangi a te kohanga reo.
Hai taa Tina Olsen Raatana tiamana takirua o te Kohanga Reo kua whai ratou i nga tohutohu a te tari engari kaahore tonu te Minita e korero ana mo nga kaupapa pera i te tohanga o te puutea ki taumata tika.
Heoi ano hai taa Parata ano kei runga i te waahi ipurangi o te Tari Maatauranga nga whakawhitinga korero katoa kia kite te iwi whaanui ko wai kei te tika.
He mea nui te haumarutanga.
Kei te haere tonu nga korero mo te pire hauora me te haumarutanga o nga kaimahi ki roto o Paaremata i te raa nei.
E mea ana a Syd Kepa peretini tuarua Maori o te Kaunihera o nga Uniana kia kaha te Maori ki te tautoko i te pire na te mea ko nga whaanau Maori ka paakinotia na te matenga o to tatou tokomaha i nga waahi o te mahi.
Hai taa Kepa ano kua memeha te pire haumaru kia kaua e tirohia nga tikanga haumaru a nga pakihi itiiti nga kaimahi.
Pooharatanga he tino pokenga.
He nui nga puutaketanga o te raruraru e mohiotia nei ko te pooharatanga.
E mea ana etahi kairangahau ko te puunaha whakahaere puutea tetahi o nga take me taa ratou kii kua tae ki te waa ki te whakahou i taua puunaha kia nui ake nga hua
e taka mai ai ki te iwi whaanui.
Atu i tera me aahukahuka te kaawana ki tona here ki te whakarato whare ki te hunga e oke ana koia te timatanga.
Copyright © 2015, UMA Broadcasting Ltd: www.waateanews.com