October 16, 2015
Hui a tau.
Hui a tau.
Me pehea te Paati Maori e whakahou i a ratou kia kaha ake te tuu?
Hai taa Naida Glavish peretini o te roopu raa koia tetahi o nga kaupapa hai korerotanga ma ratou i taa ratou hui a tau ki Raahui Pookeka a enei raa whakataa.
Ka arotake hoki ratou i to ratou hononga ki te roopu Mana me te tukanga whiriwhiri maangai a rohe.
Me whakarite rautaki whakatau.
Me aawhina i nga Kiwi ka peia mai Ahitereiria ki Aotearoa i raro i nga tikanga hou a tera whenua.
Koia te iinoi a Kelvin Davis o Reipa ki to tatou kaawanatanga i runga i te matapae kia ono mano pea nga Kiwi ka panaia na to ratou mauheretanga mo te kotahi tau neke atu te roa.
Hai taa Davis ano he Maori te maha o ratou na reira me whakarite rautaki whakatau hai tiaki i a ratou i to ratou hokinga mai ki Aotearoa.
Te Atatuu marae?
Mena ka whakatuu i tetahi marae ki Te Atatuu i Taamaki Makaurau ka rongo te iwi i nga painga.
Koia taa Peeni Henare mema paaremata o te rohe i runga i te hiahia o te haapori Maori i reira ki te kookiri i te kaupapa.
Kua whakarite whenua i Orangihina kei te kuurae o Te Atatuu hai taa Henare ano kua tae ki te waa ki te whakatutuki i nga wawata o te mana whenua.
He wero nui.
Mehemea ki te whawhai tonu nga rangatira o Ngapuhi ki a ratou e paa ana ki te whakataunga Tiriti o Waitangi a te iwi ka pehea?
Hai taa kaitono Dover Samuels ehara ma te pakanga whai mana te take e whakatau.
Waihoki hai taa Samuels ano kua hanga te Taraipiunara i te taiao e whakatutuu ai i te puehu i waenga tonu i nga uri whakaheke no Raahiri.
Taiao 2015.
Haramai nei te ahua o te ture taiao 2015 e whakakaha nei i nga tikanga kia auau tonu te tirohanga atu ki te ahua o te taiao.
Koia te korero a te roopu rangahau Maori o Nga Pae o te Maaramatanga.
Hai taa kaiwhakahaere rangahau a Taakuta Dan Hikuroa kua huri te titiro a te kaawana ki nga ahuatanga Maori me o tatou whakapono e paa ana ki te taiao.
Rapu hinu.
Kei te rangahau raraunga nga kaipuutaiao o kamupene keri hinu a Statoil e paa ana ki te aakau o Aotearoa.
E rua nga rohe moana e tirohia ana kia kite i nga papa hinu kei reira nga waahi huamata.
Kaati e kii ana te korero ko te hinu te matuu kei te rapua ehara kee ko te korohuu.
Copyright © 2015, UMA Broadcasting Ltd: www.waateanews.com