December 09, 2015
Naahinara…he huringa taangata.
Naahinara…he huringa taangata.
Kua huri a Naahinara ki te whakapai ake i to ratou whare.
Ka hoki mai a Judith Collins ki te piikau i te koopaki mo nga take Piriihimana me te Tari Whakatika Tangata.
Kua murua ona hara o mua e te Piriimia aa kua tuu kee a Collins i tenei wiki ki te whakahaawea i te Poari Maori o te Kaunihera o Taamaki Makaurau.
Ka kuhu atu a Paula Bennett hai minita hou mo nga take huringa aahuaranga ka hoatu i tana koopaki Kaawanatanga a rohe ki a Sam Lotu liga.
Oti atu ka piki tuuranga a Todd McClay mo Tim Groser hai Minita Take Tauhokohoko.
He petihana.
Kua tuku petihana etahi tauira o te Kura Tuarua o Otorohanga ki Paaremata hai whakamahara ki nga Pakanga o Aotearoa i te rau tau 1800.
Tekau mano taangata i hainatia taua petihana, na nga aakonga e toru i kohikohi.
Hai taa Peeni Henare o te roopu Reipa he kaupapa pai tera e kookirihia ana e nga rangatahi te tumanako kia aronui te motu ki tera waahanga o te hiitori o Aotearoa.
Te Urewera, he kirimana whakahaere.
Ko te hanga o Te Urewera penei me te tangata te ahua.
E kii ana a Taamati Kruger tiamana o te Poari o Te Urewera pena hiahia te tangata ki te whakatakoto korero mo te ahunga o nga whakahaeretanga ki reira me huri te titiro
ki tera whenua o Ngai Tuuhoe.
Ka mutu, kua karanghia kia tuku whakaaro te haapori whaanui e paa ana ki te mahere tekau tau e kiia nei ko Te Kawa o Te Urewera.
Waiho kia tuuwhera tonu.
Me mutu te katinga o nga kura Maori pera i a Tiipene i a Wikitooria.
Koia te karanga a Naida Glavish o te Paati Maori na te mutunga o Turakina me te tohu paatai e iri ana ki runga i a Hato Peetera.
E mea ana a Glavish ko etahi kaumaatua kei te kii kua takahia nga tikanga Maori e nga kaitohutohu a te haahi Katorika ko taua haahi tonu kei te riihi i nga whenua ki a Hato Peetera.
Aaraia nga Ihirama.
Aukatingia te kuhuna o nga iwi Ihirama katoa ki roto o Amerika.
Koia te karanga a Donald Trump kaiwhakataetae o te roopu Republicans mo te tautapa Peretini i tana paati.
Hai taa Trump ano he nui te mauaahara o te maha o te iwi Ihirama ki a Amerika na reira kia mataara.
No nga maatua te tikanga.
No nga maatua Maori te tikanga me kore ratou e tuku i a ratou tamaahine ki te Kura Tuarua o Turakina.
Ka katia te kura a tera marama.
Hai taa Hekia Parata Minita Maatauranga he kura haahi a Turakina ko te haahi Perepitiana tera kiihai raatou i aata tiaki i nga whare o te kura kia haumaru te hanga.
Hai taa Parata na te maha o nga momo kura i enei raa kai te heke haere te tokomaha o nga aakonga i te nuinga o nga kura haahi.
Copyright © 2015, UMA Broadcasting Ltd: www.waateanews.com