December 11, 2015
Taranaki Mounga
Taranaki Mounga
Kua whakaaetia te hootaka whakakore orotaa e kiia nei ko hootaka Taranaki Mounga.
24 miriona taara ka utua a nga tau tekau e tuu mai nei a te waa ka whakahokia nga manu Maori ki te papa whenua o Egmont National Park.
He mahinga ngaatahi tera ma te Papa Atawhai ko nga iwi me te haapori o Taranaki.
Atu i te whakamatenga o nga orotaa pera i te paihamu ka tahuri hoki ki te whakakore i nga taru, ki te whakaora hoki i te taiao whaanui.
Rangahaua nga tikanga tuhituhi.
Ka utua nga hootaka rangahau ki te whakapai ake i nga puukenga tuhituhi o Maori Pasifika me nga tama i raro i te kaupapa rangahau ako a te kaawana.
Hai taa Hekia Parata Minita Maatauranga ka whai hua nga kaiako me nga aakonga hai nga tau kei te haramai.
Ko etahi atu hootaka kei te aro ki nga tauira ako paangarau me nga hua o te ako waiata hai whakatau i te wairua o te tamaiti.
Kooti Motuhake
Tokomaha rawa atu nga taangata mate wairangi kei te whakakiikii i nga whareherehere o te motu.
Koia te amuamu a Kim Workman maangai korero mo te whakahoutanga o aua whare.
Koia ano tetahi e mea ana me whakatuu he Kooti Motuhake mo nga tuuroro mate hinengaro.
Hai taano ano ko te nuinga o nga kaihara mate wairangi e meingia mai ai ko nga hara iti me whakarite kee i nga tohunga hauora ki te whakawaa i a ratou.
He wheeako whai hua.
He tino tauira ki nga rangatahi te tukuna o te petihana ki Paaremata i tenei wiki e iinoi atu ana kia whakatuu i tetahi rangi whakamaharatanga ki nga pakanga o Aotearoa.
Koia te korero a Nanaia Mahuta o Reipa me tana mihi ki a Leah Bell raaua ko Waimaarama Anderson o Otorohanga nga kaihaapai o taua petihana.
Hai taa Mahuta ano kua kitea e raaua me o raaua hoa me pehea e whakarite kaupapa, me pehea e whakarerekee tikanga i raro i te puunaha toorangapuu.
Awanuiaarangi ki Taamaki.
Kua whakatuuwhera Te Whare Waananga o Awanuiaarangi i tetahi peka o to ratou kura ki roto o Manukau i te raa nei.
Hai taa toihau o te waa a Wiremu Doherty tera pea hai te tau 2020 kia kotahi mano neke atu ranei nga tauira e ako ai ki to ratou puni hou.
Ka mutu ka whakatuu i nga akoranga maha ki reira ki Manukau a tera tau ko nga kaupapa maatauranga, toi whakaata, ko te reo me ona tikanga,ko nga kaupapa taapoi etahi ka taapaetia ki nga aakonga.
Ture Whenua
Kua haina kirimana nga tiamana a iwi ki te Minita Whanake Maori e tautoko ana i te whakahoutanga o te ture mo nga whenua Maori.
Koni atu i tera ka whakariterite i nga tikanga hai whakakapi i te Pire Ture Whenua Maori.
Kua matapakihia nga rerekeetanga i te hui a te Taraipiunara o Waitangi i tenei wiki me te wehi o etahi kaitono tera pea ka huri te Kooti Whenua Maori hai taraipiunara niho more.
Ka mutu hai taa Wiremu Te Aho kaitohutohu ki nga rangatira a iwi ma te pire hou ka hoatu ki nga kaipupuri whenua Maori nga taputapu ki te whakatupu i o ratou whenua.
Copyright © 2015, UMA Broadcasting Ltd: www.waateanews.com