December 15, 2015
Rawakoretanga kaute nui.
Rawakoretanga kaute nui.
Kua tata ki te 30 paiheeneti o nga tamariki e noho ana i raro i te kapua o te rawakoretanga.
E mea ana te Kaikoomihana Take Tamariki a Russell Wills he tohu tera tatauranga kei te tiitaha haere a Aotearoa aa ko te oranga o nga tamariki te utu.
Ki a ia kua huarua nga tamariki Maori Pasifika o nga kaainga poohara i te kaute o nga Paakeha.
Oprah poowhiri
Kua poowhiritia a Oprah Winfrey ki runga i te marae o Oraakei i tenei ahiahi.
I tenei ata i hau atu ia ki te ngahere ki Waitaakere aa kua piki i nga maunga o Maungawhau raaua ko Maungakiekie i te raa.
Koia te waahanga tuatahi o tana haere ki konei ki Aotearoa mo tana whakakitenga ki Vector Arena a te po o apopo.
Haamene kaawana.
Ka tuu tonu tetahi aakonga whare waananga ki te haamene i te kaawana na to ratou ngoikore ki te whakaheke i nga putanga hauhaa o Aotearoa.
Hai taa Sarah Thomson o Waikato me whaaki te kaawana i te koroukore o a ratou whakatau.
Ki a ia ano horekau he rerekeetanga o nga whaainga taiao o tenei motu me te kii taurangi 57 heeneti o ia tangata ki te whakaheke putanga otiraa he kongakonga noa iho tera.
Whare koopapa
He koopapa te noho koopipiri ana te maha o nga whare i Taamaki Makaurau e hia kee nga whare kua kii ake i nga whaanau e rua neke atu ranei.
Koia te kitenga o te whare puutea o te ASB me te korero i taa ratou puurongo.
Tokotoru te kaute ine waenga o te whare kotahi i Taamaki he iti ake kei waho o Taamaki.
Piriihimana kei te riri.
Ka nui te riri o nga piriihimana ki te tangata i puta atu ki te au o te moana i runga kaipuke horekau he koti whakaora aa kua haurangi.
E rima haora ia i kimihia atu i te aakau o Mangawhai i tenei ata. I karangahia nga roopu whakaora mai Ruakaakaa ki Waipuu.
I te mutunga ake hai taa te tari piriihimana i waimarie te tangata raa 63 ona tau ahakoa ona whanonga haarakiraki kei te ora tonu.
Waikato ohanga
Kaahore ano te oohanga o Waikato kia tatuu ki tona uaratanga.
Koia te korero a Parekaawhia McClean tumu whakarae o Waikato Tainui engari ki a ia ma te rautaki hou a Waikato ka aarahi i te Maori me pehea e tautoko ai nga whaainga oohanga o te rohe i te waa tonu e whakatutuki ai nga hiahia o o ratou hapuu, o o ratou iwi.
Kaati ko te rautaki e korerohia nei he waahanga o te mahere roa a te Kaunihera.
Rangatahi, tiakina.
E tika ana kia utu tonu i nga waahi kei reira nga taiohi kaingakore e tiakina ai.
Koia te tumanako o nga kaitautoko i nga kaupapa rangata me te mohio kei te haapai petihana i tenei waa kia whakapiki i te pakeke mo te katinga o te tautoko.
E mea ana ratou he raruraru nui tera ka patu i te maha o nga rangatahi Maori ki te kore e whakapiki te tau whiwhi tautoko.
Ruapekapeka whakamaharatanga.
Ka tuu kotahi nga iwi o te Taitokerau ki te whakamahara i te pakanga o Ruapekapeka i te tau 1845 ki te tonga o Kawakawa.
Hai taa Hemi Taitin o Ngati Hine ko te take o te kaupapa nei hai whakahou i nga hononga o Ngati Hine ki nga hapuu o Te Pewhairangi i te Taitokerau.
Kaati ka whakahaere i te hui whakamaharatanga a te 10 o Kohitaatea ki Nga Tapuwae Haruru.
Tuwharetoa otinga pai.
Kua tahuri te Roopu Whakataunga o Tuuwharetoa ki te whakakaha i to ratou puutake oohanga.
Kua karangahia e ratou he otinga whai hua 11 ira 6 miriona taara te rahinga mo te tau taake kua mahue ake nei. Hai taa tiamana Raakeipoho Taiaroa he mea nui te hokona o etahi whenua whakataunga pera i te poraka Hautuu Rangipo.
Ka mutu hai taana ano na te otinga pai nei ka tiimata ano nga tohanga puutea ki nga marae o Tuuwharetoa.
Kaupapa whare.
Na runga i te rikarika ki te whakatuu whare ki roto o Taamaki Makaurau kei te haukoti i te ahei o te Maori ki te whakaruruhau i nga motika a hapuu, a iwi.
Koia te whakapae a Peeni Henare mema paaremata o Taamaki mo nga paanga o nga whakahou ki te Ture Whakahaere Rawa.
Koni atu i tera kei te aawangawanga a Henare ki te mahuetanga o etahi roopu Maori i nga Kaunihera me a ratou tukanga whakawhiti korero.
Hinerangi whakataunga.
Tera pea ka tukua ki a Ngati Hinerangi o Tainui waka etahi whenua kura i Matamata me Omokoroa hai waahanga whakataunga Tiriti o Waitangi.
Kua hainatia taa ratou whakaaetanga ki te Karauna i te Raahoroi aa ka whakawhiti etahi waahi kei te pae maunga Kaimai me nga whenua tuku iho o te iwi.
Ka mutu kua whakatauhia te utu puutea 8 ira 1 miriona taara hai hoatutanga ki a Ngati Hinerangi.
Mauhere ka utua.
Ma nga mauhere e utu i te puutea mo te peinga mai.
Koia te korero hou a Ahitereiria mo era o nga mauhere kei Ahitereiria tonu e tatari ana kia panaia mai ki Aotearoa.
Hai taa Meetiiria Tuurei o nga Kaakaariki kai herea nga mauhere ki taua utu mo ake tonu atu ahakoa nga kii taurangi ka kore e pera.
Copyright © 2015, UMA Broadcasting Ltd: www.waateanews.com