December 22, 2015
Manene maha.
Manene maha.
Kotahi rau rua tekau mano nga manene kua tae mai ki Aotearoa
i te tau pahure atu nei. E ai ki te tari tatauranga he pikinga 11 paiheeneti tera i te tau i mua atu.
No Aahia te nuinga o nga manene, te tini o ratou he aakonga no India.
Oti atu 57 mano taangata i wehe atu ki whenua kee noho ai he hekenga 3 paiheeneti tera.
He Hononga Motuhake.
Ko te tumanako kia whai etahi atu rohe i te tauira mahi tahi o Te Arawa ki te Kaunihera o Rotorua.
A te tau hou ka whakarite te Poari Hononga Tahi o Te Arawa e kiia nei ko Te Tatau o Te Arawa i nga maangai a iwi ki nga komiti kaunihera.
Hai taa Te Ururoa Flavell i te taunga o te puehu kua whai reo te tangata whenua e paa ana ki to ratou rohe.
Ka mutu hai taa Flavell kua mautohengia te hiahia o te Maori ki te whai reo ki nga whakaritenga Kaunihera ki Ngamotu, ki Tauranga, ki Whangarei.
Toi
Ka nui te hiakai o te haapori whaanui o Tuuranga ki nga toi Maori.
Koia te korero whai muri te whakaaturanga e toru nga raa i tetahi whare toi o Kaitii otiraa ko te tuatahi o nga maakete toi Maori i reira.
Hai taa kaitoi Izzy Te Rauna he mea miiharo ki a ia te kitenga o te tini taangata me te maha o nga mahinga toi i hokona atu.
Kaati e meingatia ana ka tuu ano he maakete toi Maori a tera tau.
Puutaiao whaaia.
E mahi tahi ana nga kura tuarua o te Papaioea ki te Whare Waananga o Massey ki te akiaki i nga rangatahi Maori ki te ako i nga kaupapa puutaiao.
Ka tautoko te whare puutaiao o Puuhoro i nga taiohi o nga kura o te takiwaa whaanui pera i a Hato Paora me Manukura i runga i te mohio he torutoru nga aakonga Maori e whakapaa atu ai ki te puutaiao ahakoa kei te tupu haere te hiahia ki era momo puukenga.
Tuupeka Ahitereiria
E tootoia ana te Kaawanatanga ki te whakatatuu he ture mo te tuupeka kia momore te ahua a waho o nga pouaka pera ano raa Ahitereiria.
E mea ana nga roopu auahi kore me whai a Aotearoa i taa Ahitereira e tauira ai kia uu tonu ki te mahere auahi kore 2025.
Hai taa Zoe Hawke o Te Ara Haa Ora kei te kino tonu te tatauranga o nga Maori e kai paipa ana.
Copyright © 2015, UMA Broadcasting Ltd: www.waateanews.com