May 04, 2016
Riihingia te whenua
I etahi waa, he pai mo te oohanga Maori ki te riihi whenua.
Koia te tirohanga a Dion Tuuta toihau o Te Ohu Kaimoana me te huringa o tana whakaaro ki nga hua ka puta i te riihi. Hai taana, me riihi whenua te Maori, ki te kore e ahei ki te whakapai ake i taua whenua me ona ahuatanga, na reira i etahi waa kaare he take o te hoko.
Kaati hai taana ano, ko te mea nui me aata wetewete tatou i nga huarahi ka taea te whai, kia whiriwhiri i te huarahi pai ake mo te taha ki te oohanga hai te waa tonu e maumahara ai tatou i o tatou here a ahurea.
He wero
Na te whakaritenga o nga kaiwhakahaere kiritea mo te toorangapuu, kua whakaaetia te tukuna o nga kaitoorangapuu ngoikore ki nga tuuranga i taawahi.
Koia te karanga a Winston Peters rangatira o Aotearoa Tuatahi mo te hiahia o Naahinara ki te whakatuu i ona taangata ki nga tuuranga pera i te maangai motuhake
o Aotearoa ki etahi whenua.
Hai taa Peters, mehemea ki te whai hua tana roopu i te waa o te koowhiringa pooti, ka aatete i taua tikanga whiriwhiri taangata a te kaawana.
Utu itarere
Na te paapaku o nga taumata itarere i te tau kua pahemo, kua huri te hunga whakangao puutea atu i Taamaki Makaurau ki nga rohe ki te rapu whare mo ratou.
Kua piki te utu ine waenga o nga whare huri noa te motu i te 2 ira 1 paiheeneti i nga marama e toru kua ngaro nei.
E mea ana nga kaiwetewete take puutea ko te taumata itarere te mea nui i tenei waa.
Na te iti o taua taumata ka maaia tonu tatou ki te hoko whare.
Poka Tuuroro
He mea nui kia whakapiki i te maha o nga taakuta Maori e taea ai te poka tuuroro.
Hai taa te roopu o nga taakuta poka tuuroro o Ahitereiria, ma reira ka whakapai ake i te ahua o nga ratonga hauora ki te Maori.
Tokowhaa nga taakuta Maori e tautokohia ana ki te haere ki te hui a tau mo nga take puutaiao ki Piripane i tenei wiki.
Ko te hiahia kia akiaki i a ratou ki te poka tuuroro hai te roanga o te waa.
Copyright © 2016, UMA Broadcasting Ltd: www.waateanews.com