June 09, 2016
Tuukino
No tatou katoa te hee mo te tuukino tamariki.
204 nga tamariki kua mate i te tuukino no te tau 92, 13 o ratou i tera tau.
Ki etahi e kore e taea te kii he raruraru a iwi, ehara hoki no te kaawana te hee.
Ko te raruraru e mea ana nga kairangahau, ko o tatou waiaro me te whakaaetanga ki te tuukino na reira ratou e kii ana kia kite i te tuukino, i te patu, kaua e tuu noa iho penei me te pakoko te hanga, kaua e huri i te tuaraa.
Pukapuka
Kua whai waahi he korero hou mo te haka a Te Rauparaha ki te whiringa whaaiti o nga tohu pukapuka o Aotearoa mo nga tamariki me nga taiohi.
Ko kaituhi Maori a Patricia Grace te tangata naana te pukapuka e kiia nei ko Haka i tuhi.
Kaati ko Whiti te raa te kaupapa Maori o te pukapuka raa aa kua tae hoki tera kia whiriwhirihia ki te tohu Kura Pounamu mo nga pukapuka i te reo Maori.
Whakahokihia ki te kainga
Whakahokihia ki Aotearoa nga tuupaapaku o nga hoia i mate ki Malaya i te rautau ono tekau kei reira tonu e takoto ana.
Koia te karanga a Ron Mark o Aotearoa Tuatahi maangai take hoia tautoohito.
Kua tahuri a Ahitereiria ki te whakahoki i nga toenga o te 32 o ona taangata.
Hai taa Mark ano, kei Malaya nga hoia 30 o Aotearoa kei nga Urupaa anuanu, kei te kapi etahi poka i te raapihi.
Tainui
Kei te whakangao puutea a Waikato Tainui ki te hanga i tetahi waahi tauhokohoko i te pokapuu o Kirikiriroa.
Ko te hiahia kia whakaara ake i te ahua o taua waahanga o te taone kei te takiwaa i reira te teihana tereina.
Ka mutu e titiro ana ratou ki nga tari, ki nga whare, ki nga toa hokohoko.
Waikerepuru
Inapo raa i tuu nga iwi o Taranaki ki te whakanui i a kaumaatua Huirangi Waikerepuru i te whare pupuri taonga o Pukeariki i Ngaamotu.
I reira hoki ko te Minita Maori Te Ururoa Flavell ki te whakahoonore i a Huirangi mo aana mahi mutunga kore i roto i nga tau ki te haapai i nga kaupapa a iwi, me nga kaupapa o te reo Maori.
Kaati he nui nga mihi aroha i tuku atu ki tera o nga pou aarahi o te reo.
Copyright © 2016, UMA Broadcasting Ltd: www.waateanews.com