June 13, 2016
Ope taua puutea nui
Hai aha i te whakapau puutea ki te whakarahi i a tatou ope taua.
Koia te karanga a etahi kaiwetewete toorangapuu whai muri te karanga a te kaawana kia rua tekau piriona taara ka utua ki tao o te riri a nga tau 15 e haere ake nei.
Hai taa Chris Trotter kaituhu take toorangapuu, ma taua rahinga puutea ka hanga i nga whare maha noa atu mo nga whaanau e oke ana.
Ki a ia ano e aawangawanga ana ki te iti o te reo whakahee.
Reo whakaora
Ma nga tikanga hai whakaako i te reo Maori i Aotearoa, ka aawhina i te iwi Ainu o Haapanihi whenua kia mau ki to ratou reo.
I tatuu ki Taranaki nga Ainu i tera wiki ki te hui tuatahi o Te Reo o Taranaki.
Hai taa Minita Maori a Te Ururoa Flavell, na te tautoko a te Maori kua anga whakamua nga Ainu i te huarahi roa ki te whakaora i to ratou reo.
Iniana petihana
E mea ana nga rangatira o te haapori Iniana ka maaia ake nga rangatahi ki te taahae ki te aha mehemea ki te whakamaamaa i nga haamene ki nga Kooti Rangatahi.
Kua tuku petihana te Roopu Iniana o Aotearoa kia kaua e whakapiki i te pakeke mo te haere o nga taiohi e taka ai ki te hee ki te kooti, kia 17 tau.
Hai taa taua roopu ano, ka titiro te nuinga o nga taahae ki nga teihana penihiini, ki nga toa hoko waipiro, ki nga toa hoko paipa me te mohio e hia kee nga tamariki kua kuhu atu ki era waahi ki te whaanako i te paipa, i te tiakarete, i te aha.
Raakau whakatoo
E iwa nga kaakano raakau Maori kua whakatoongia ki te tihi o Maungakiekie i Taamaki Makaurau, he tootara etahi, he pohutukawa etahi.
Koia te mahi hai whakakapi i te raakau paina i tapahia 16 tau ki muri.
Hai taa Paul Majurey tiamana o te Kaahui Tupuna Maunga o Taamaki, i tatari nga iwi kia mutu raano nga whakataunga tuku iho
me te whakaae a nga iwi katoa.
Ki a ia ano, kua whakaarahia te aro ki nga puia o te rohe whaanui.
He ika a whiro kua hinga
Kua hinga ano he tootara o te wao nui a Taane, he toa, he tautoohito o Te Taitokerau, ko Charlie Peetera tera he ika a whiro o te roopu 20.
He nui nga mahi a te kaumaatua raa ki te haapai ake i tona iwi i a Ngati Kurii.
Ka tanumia ki te rua kooiwi o ona maatua apopo ki Ngataki no reira e te rangatira takoto mai takoto mai moe mai raa.
Copyright © 2016, UMA Broadcasting Ltd: www.waateanews.com