March 22, 2016
Hootaka whakarite
Kia pai ake te mahi ngaatahi ki te Maori te whaainga matua i raro i te hootaka e rua tau te roa e kiia nei ko Te Whaihanga.
He whakakotahitanga tera o nga waananga e whaa, hai whakariterite i nga kaiwhakarite mahere i nga kaiwhakahoahoa whare o apopo me pehea e mahi tahi ki a Ngai Taatou.
Hai taa kaiwhakahaere a Ahorangi Dory Reeves, kua kohia nga puukenga huhua ki te whakaara ake i te kaupapa.
Tianara hou
Kua karangahia ka piki tuuranga a Kahurangi Patsy Reddy mo Taa Jerry Matepaarae hai Kaawana Tianara hou o Aotearoa a te marama o Mahuru.
He roia a Reddy. Ko ia hoki tetahi o nga kanohi i tirohia nga roopu puurahorua o Aotearoa inakuaraa.
Ka mutu he nui ona puukenga e paa ana ki nga kaupapa whakahaere roopu.
Puunaha hou?
E tika ana me whakarite puunaha hou hai tohatoha i nga rauemi tika ki nga kura…i te waa tika, ki te tamaiti tika.
Hai taa Heekia Parata Minita Maatauranga, ma tana tari taua puunaha e whakatupu i runga i te kohinga o nga moohiohio whaanui e paa ana ki nga tamariki me o ratou whaanau.
Hai taa Parata ano, na runga i nga ngoikoretanga o te puunaha decile system o naianei ka whakakorikori i te mahi a nga kura me te tupu o nga tamariki ia rima tau.
Waihoki ka whakahaawea i nga kura o nga rohe poohara me o ratou kaiako.
Awha i te raki
He aawha te korero mo te Taitokerau i tenei rangi, me te raa o apopo.
Kua puta te karanga whakatuupato a te tari huarere mo te raki me etahi takiwaa o te Waipounamu.
He ua taataa hoki te karanga i etahi waa engari ka maawhe taua aawaha i te ata o apopo.
Heoi ano, he rangi paki te matapae i tenei raa mo te nuinga o Aotearoa.
He tono
Kua kawe nga hoia Maori o mua i taa ratou tono ki te Taraipiunara o Waitangi.
Inanahi i tuu te tuatoru o nga hui i te marae o Otiiria Te Taitokerau…ki te matapaki i nga paanga o te pakanga ki te Maori.
Ki taa etahi tautoohito he nui nga taimahatanga i taka mai ki runga i a ratou a tinana, a hinengaro, a ngaakau, a wairua.
Aapiti atu ko te iinoi a etahi kia whakahoki i nga hoia 60 pea kei nga urupaa o Aahia e takoto ana, kaahore etahi e tiakina ana.
Ngaakau rorotu?
Kua heke te maaiatanga o Aotearoa ki nga take oohanga o te waa.
Koia te karanga a nga tohunga tirotiro take oohanga i runga i nga korero kino mo te ahuwhenua
me te manawapaa o nga kaituku mahi ki te rapu kaimahi hou. Atu i era ahuatanga, kei te rangirua etahi ki te ahu pehea o nga maakete i taawaahi.
Ka mutu, kei raro rawa te maaiatanga a oohanga o Ahitereiria i tenei waa.
Copyright © 2016, UMA Broadcasting Ltd: www.waateanews.com