April 14, 2016
Oohanga Maori
He waa moorearea tenei mo te tupu oohanga o te Maori. E mea ana etahi kaiwetewete take toorangapuu, e whakaemi ana ko etahi hau toorangapuu kei whakatiitaha i te anga whakarunga o te Maori me o tatou wawata oohanga.
Ko te kaupapa here mo te wai maori, ko te pire ture whenua Maori me te ture whakahaere rawa etahi kei te koororihia e nga kaitoorangapuu.
Kaati e reri ana etahi pera i a Winston Peters me tana toki ki te wero ko taana e pai ai.
Ngapuhi
Kei runga i te huarahi te roopu mo te paanga o nga hapuu o Ngapuhi ki te rapu korero araa me pehea e whakapai ake i te tukanga whakatau Tiriti o Waitangi a te iwi.
Kua puta kee te puurongo e karangahia ana me waiho nga whakatau ki nga kaikorero a hapuu aa, ma ia hapuu aua kaikorero e whiriwhiri.
Ka tuu nga hui korero ki Kaikohe apopo me etahi atu kaainga Maori a nga raa e tuu mai.
Kahungunu reo
Kei te karanga atu a Ngati Kahungunu ki nga tohunga whakaora reo o te ao ki te aawhina i te haapaitanga o te reo ki roto i a ratou.
E whakahaerehia ana he hui i tenei waa ki Heretaunga kei reira nga tohunga o Hawaii, o Israel, o Aotearoa.
Hai taa Taatere Mcleod kaiwhakahaere o te reo me nga tikanga o Kahungunu, kei te ngaro haere te maha o nga kaikorero ia raa aapiti atu.
E heke haere ana te maha o nga kohanga reo.
Peepee
Ka tuu tetahi hui ki Paaremata mo te aaraitanga o nga mate peepee i te moenga e kiia nei ko SUDI.
Te hanga nei kaahore e tika ana te rahinga o te tautoko ki nga whaea Maori muri i te whakawhaanautanga.
Tino kino te tatauranga o nga peepee Maori ka mate i te mate moenga o SUDI me te kitenga ka nui te tini o o tatou peepee kaahore e tirohia ana e tetahi maatanga hauora.
Nau mai haramai Martin Guptill
Koia te karanga a te tiima toa o te whakataetae IPL araa ko nga Mumbai Indians na te whara ki tetahi o o ratou kaitaakaro ki a Lendl Simmons o te West Indies.
Kaore a Guptill i paingia e tetahi roopu kotahi i te timatanga o te whakataetaE, engari, whai muri i tana tuu kaha i te whakataetae 20/20 o te ao, te hanga nei kua huri te whakaaro o etahi.
Kua kuhu atu a Brad Thorn oopango o mua ki te puni o nga Queensland Reds hai kaiako tautoko mo te toenga o te whakataetae 18 i tenei tau.
Kua whakaatu kee a Thorn i ona puukenga whakaako i a ia e aawhina ana i te kapa rangatahi o Queensland i tera tau.
Hai taa Daniel Herbert kaiwhakahaere o te uniana whutupooro o Queensland, e kore kaahore ka whai hua te kapa matua ma te paanga o Thorn me ona wheeako ki a ratou.
Copyright © 2016, UMA Broadcasting Ltd: www.waateanews.com