October 10, 2016
E werohia ana a Flavell e Meka Whaitiri
E werohia ana a Flavell e Meka Whaitiri
Hei taa te Minita Whakawhanake Maori, a Te Ururoa Flavell, ehara i te mea kei a ia te mana ki te tohu i nga kaimahi ki te Kooti Whenua Maori, heoi, ko tona wawata, kia noho tonu nga kaimahi tautohito ki reira kia pai ai te whakatutukihanga o nga panonitanga ki te Ture Whenua Maori. E werohia ana a Flavell e Meka Whaitiri, na te mea, tera pea ka kore mahi etahi o nga kaimahi o te Kooti Whenua Maori i raro i nga panonitanga ki te Ture Whenua Maori. Hei taa Flavell, kei a ia te mana ki te tohu i nga kaiwhakawaa ki te Kooti Whenua Maori, engari, kaore i a ia te mana e pa ana ki nga kaimahi.
E whakahee ana a Davidson ki te whakatau a etahi
Kei te whakahee te mangai tika taangata o te roopu Kakariki, i te whakatau a etahi, he moumou wa noa iho tana haere ki Gaza i tera wiki. I panaia a Marama Davidson i Iharaia whai muri iho i te mauheretanga o ratou ko ona hoa waahine o te kahui waka rongomau i nga kaipuke tauaa o Iharaia. Hei taa te peremia a John Key, ehara i te mea, i atamai te whakaaro kia haere ki reira, hei taa Ahorangi Paul Moon o te Kura Aronui o Tamaki, katahi te kahui waka kawe haakawa ko tera. Hei taa Davidson, me korero-a-waha tonu a Moon ki nga waahine o te kahui, ma reira ia e marama ai ki te ihumanea me te ngakau rangatira o era waahine.
Huka kore i nga kura me nga waahi mahi
Kei te whakaterehia he panui whakaahua i roto i te whare paaremata i tenei ra hei whakairi ki nga paatuu o nga kura me nga waahi mahi puta noa i te motu. Ko te ngako o taua panui, kia huka kore nga inu e inumia ana e waa tatou tamariki me waa tatou kaimahi. Ko te timatanga tenei o te whai a te Kawanatanga kia huka kore nga inu o roto o Aotearoa hei te tau rua mano rua tekau ma rima. Hei taa nga maatanga hauora, ina ngakau pono te whakaaro o te Kawanatanga ki tenei kaupapa, me whakatuu ture huka kore, ma reira e tino tutuki ai, e tino whai mana ai.
Putahi Wai Maori hou
Kua whakatuuria he Putahi Wai Maori hou, ko Te Waiora te ingoa, a, e whai waahi ana a Taihoronuku, ara, a NIWA me te Whare Wananga o Waikato ki taua putahi. Ka noho ko te Kaareti ki Hopuhopu hei kainga mo te Putahi hou nei, no reira, ka whai waahi nui hoki te Maori ki roto i nga whiriwhiringa me nga wananga i roto i taua putahi. Hei taa te Minita i nga Take Putaiao Auaha, a Steven Joyce, ka tauawhi te Putahi o Te Waiora i te matauranga putaiao, puukaha, ture, whakahaere rawa, ohanga tae atu ra ki te matauranga Maori. Ka ata whiriwhiri a Te Waiora i te whai paanga o te iwi Maori ki te wai Maori, ka ata whakatairanga hoki i nga take wai Maori ki te motu.
Te ra kainga kore
He uaua, he piere nuku te kimi rongoaa mo te kainga koretanga. Koira taa te Minita Whakawhanake Maori, taa Te Ururoa Flavell. I haere a Flavell ki te tapawhaa o Aotea i Tamaki inanahi ki te tautoko i te ra kainga kore, puta noa i te ao. Hei taana, kua ahua roa tatou o tenei whenua e kite ana i te kainga koretanga, a, na te mahi a nga marae pera i Te Puea, kua uu te kainga koretanga ki o tatou ngutu hei korerotanga ma tatou.
Copyright © 2016, UMA Broadcasting Ltd: www.waateanews.com