October 11, 2016
Marae Para Kore
Marae Para Kore
E tahuri ana te tini o o tatou marae ki te kaupapa para kore. Hei te mutunga o te marama nei ka tuu te hui-a-tau e pa ana ki te para koretanga me te hangaruatanga ki te paa o Parihaka. Hei taa Emily Bailey o te roopu Para Kore Taranaki, neke atu i te kotahi rau, whitu tekau marae puta noa i te motu kua hono ki te kaupapa, a, e ngana ana ia ki te akiaki i nga marae katoa o Taranaki kia para kore ratou.
Mike Tana Mea o Porirua
Katahi ano ia ka tohua hei kahika o Porirua, me te aha, kei te whakatairanga a Mike Tana i tona rohe hei waahi whakahirahira mo nga manuhiri. No Ngati Whatua, Te Uri o Hau a Tana, engari, tekau ma rima tau ia e noho ana ki Porirua. Hei taana, e tika ana kia tuu nga manuhiri ki Porirua, i te mea, kei reira etahi kura huna. Hei taa Tana, ko tetahi o ona hiahia hei kahika, he whakapakari i te hononga o te Kaunihera ki te mana whenua, ara, ki a Ngati Toa Rangatira.
Nga manene ki Aotearoa
Kua puta te whakatau i te Kawanatanga, kei te whakauaua ake ratou i te urunga mai o nga manene ki konei. Hei taa te Kawanatanga, ka heke te nui o nga manene ka tukuna kia uru mai ki konei, i te kotahi rau mano ki te iwa tekau ma rima mano ia tau, a, ka uaua ake nga tikanga hei whakatutuki ma nga manene e hiahia ana ki te haere mai ki konei. Hei taa te kaiarahi i a Aotearoa Tuatahi, a Winston Peters, he mahi ngutu kau noa iho tenei na te Kawanatanga, a, ma enei whakaputanga hou, ka aha?
Marama Davidson hokinga mai i Gaza
Katahi ano a Marama Davidson o Nga Kakariki ka hoki mai i Gaza, otira, i tana kaupapa i ngana nei ia ki te whakatairanga i nga korero mo te tauaarai nui e tuu ana ki reira kia kaua ai nga awhinatanga a te ao e tae atu ki nga paarurenga o te riri i taua rohe. Heoi, hei taa tetahi Maori e tautoko ana i te whenua o Iharaia, i hee te kaupapa i haere atu ai a Davidson ki reira. Hei taa Sharnee Trotter o Te Arawa, i wehe a Iharaia i Gaza i te tau rua mano ma rima kia tau ai te rangimarie ki waenganui i a ratou ko nga Huurae, engari, auare ake.
Pukapuka mo Ngati Kahungunu
E toru nga pukapuka mo Ngati Kahungunu i whakarewahia ai i te whare paaremata inakuanei…ko tetahi o aua pukapuka, he takinga korero rereke e pa ana ki a Rongomaiwahine raua ko Kahungunu. Na Maxine Hemi nga pukapuka nei i ata tuhi kia hangai ki te hunga tamariki kia mohio ai ratou ki nga korero whakapapa me nga korero hiitori mo te iwi o Kahungunu. Na Huia Publishers nga pukapuka nei i whakaputa.
Whakataetae Ipu Ahuwhenua
Kei te akiakihia nga paamu Maori kia uru ki te whakataetae mo te Ipu Ahuwhenua i tenei tau. Kei te tautoko te Whare Tahua BNZ i te whakataetae i tenei tau, a, hei taa te upoko o te koomiti whakahaere, a Kingi Smiler, ma te uru ki te whakataetae, ka ata arotakehia te mahi a tena paamu, a tena paamu, a, ka whai ratou i etahi korero awhina kia pai ai taa ratou whakatipu i waa ratou rawa. Na taa Apirana Ngata raua ko te Kawana Tianara o te wa, a Lord Bledisloe te whakataetae i whakarewa, e waru tekau ma toru tau ki muri, kia kounga ai nga paamu Maori.
Kawanatanga te hee mo te tuakokatanga
No te Kawanatanga te hee, e noho nei te tokomaha o tatou i roto i te tuakokatanga. Koira taa te roopu Auckland Action on Poverty. Hei taa to ratou mangai a Vanessa Cole, kua puta he purongo i Te Whakakotahitanga o te Ao, e kii ana, kaore tenei Kawanatanga i te paku aha hei aukati i te maahorahora haeretanga o te tuakokatanga. Hei taana ano, he Maori te nuinga o nga tamariki tuakoka. Hei taana, me whakapiki te Kawanatanga i te penihana kia mama ake ai te noho a te hunga tuakoka.
Copyright © 2016, UMA Broadcasting Ltd: www.waateanews.com