October 24, 2016
Nolan Raihania
Nolan Raihania
Kei te whakahokia a Nolan Raihania, ika-a-whiro o te rua tekau ma waru, ki te koopu o te whenua i te ata nei. I muri i te pakanga, he kaihohou rongo ia, he kaikaunihera mo Mataura, he kaiako kapa haka, he tarahiti i te Runanga o Ngati Porou. Hei taa Parekura Kupenga, kaumatua o Ngati Porou, i kaha hoki a Raihania ki te tohatoha i ona mohiotanga me ona wheako ki te hunga rangatahi
Hui Para Kore
Kei te whakahaerehia te hui Para Kore ki Parihaka hei enei rangi whakataa. Ko te kaupapa, ko te para koretanga me te hangaruatanga ki runga i o tatou marae. Hei taa tetahi o nga kaimahi o Para Kore Taranaki, a Urs Signer, ko Grant Steven no te Kuratini o Te Tai Tokerau tetahi o nga kaikorero, he matanga hangarua, a, he whakaaro oona mo te whakatuu whare e aro ana ki te taiao, otira, he whare e whakamahia ai te raupoo me era atu rauemi i whakamahia ai e o tatou tuupuna ki te hanga whare i nga wa o mua. Ko te whakatuu maara kai hoki tetahi atu take hei korerotanga ma te minenga o te hui.
Te whakakitenga o nga mahi a Gottfried Lindauer
He koha ki nga whakatipuranga. Koira te korero e puta mai ana hei whakaatu i te whakakitenga o nga koowaiwai tuupuna Maori a Gottfried Lindauer. Hei taa te kaitiaki Maori o te whare toi o Tamaki, a Ngahiraka Mason, e whakahonohono ana enei koowaiwai i a tatou ki te ao nehe me o tatou tuupuna o tua whakarere. Kei te whakahaerehia te whakakitenga nei tae atu ki te marama o Huitanguru a tera tau, kaore he utu kookuhu.
Putea toopu a te Kawanatanga
Kotahi ira kati waru piriona taara te putea toopu a te Kawanatanga i tenei tau putea. Hei taa te Minita i nga take Putea a Bill English, e whiriwhiri ana te Kawanatanga me pehea taa ratou whakapau i taua putea, engari, ko tetahi whakaaro nui kia tapahia nga taake i mua i te kowhiringa pooti a tera tau.
Copyright © 2016, UMA Broadcasting Ltd: www.waateanews.com