October 25, 2016
Te wehenga a Hekia Parata mai i te Kawanatanga
Te wehenga a Hekia Parata mai i te Kawanatanga
He maha tonu nga mahi hei whakatutuki maaku, i mua i taku hekenga ki raro. Koira taa te Minita i nga take Matauranga, taa Hekia Parata. Hei taana, i mama te whakatau kia wehe i te ao torangapu, whai muri iho i te tekau tau oona ki reira, engari, kaore ano ia kia ata whiriwhiri ka aha ra ia hei nga tau e tuu mai nei.
Nga kaiako e wehe atu ana i Tamaki
I whakatupatoria te Kawanatanga, kotahi tau ki muri, mo te tini o nga kaiako e wehe atu ana i Tamaki, he teitei rawa hoki no te utu mo nga whare, engari auare ake te whakarongo. Koira taa te mangai torangapu mo Manurewa, taa Louisa Wall, whai muri iho i te whakatau a te kura o Mount Albert Grammar, tokotoru ana kaiako e wehe ana. Hei taa Wall , he maha nga kura o tona rohe e kimi kaiako ana, engari, kaore i te kitea, na te mea, kei te haere nga kaiako ki nga rohe mahi ai, noho ai.
Whakahee i te mahi Statoil
I konei te upoko o te iwi Sami, a Aili Keskitalo i nga rangi tata nei, e korero ana ki nga rangatira-a-iwi o te Tai Tokerau i runga i te marae o Ahipara. Ko taana kaupapa, ko te whakatau a Statoil, he umanga hinu no tona ano whenua, ara, no Norway, kia mutu taa ratou mahi taunaha hinu ki te papa moana e karapoti ana i Te Reinga. Hei taa Pita Paraone o Aotearoa Tuatahi, tokomaha nga uri o Te Tai Tokerau i whakahee i te mahi a taua umanga.
Tamati Coffey mo Reipa Te Waiariki
E horahia ana e te mangai mo Reipa ki te turu o Te Waiariki, e Tamati Coffey, te taki ki mua i te Minita Whakawhanake Maori, ki a Te Ururoa Flavell. Kei a Flavell taua turu i tenei wa, engari, hei taa te mangai torangapu mo Te Taitokerau a Kelvin Davis o Reipa, e mohio ana a Coffey, me pehea te kukume i nga ngakau o te marea kia tautoko ratou i a ia.
Ngapuhi purongo Maranga Mai
E mea ana etahi hapuu o te Pe o te Whairangi, hei aha atu maa ratou te purongo Maranga Mai. Kua tono enei hapuu i o ratou ingoa ki te Tari Whakatau Tiriti kia riro ma ratou aa ratou take tiriti e amo tiitoki, kaua ma Tuhoronuku, ma Te Kotahitanga ranei. Hei taa Arapeta Hamilton o Ngati Manu, ko ratou ko Ngati Kuta, Patukeha me Rahiri etahi kaore i te hiahia kia taka ki raro i te korowai o Tuhoronuku, o Te Kotahitanga ranei.
Tipa Mahuta mo te Kaunihera Whanui o Waikato
Kua pootihia ano a Tipa Mahuta hei toihau tuarua o te Kaunihera Whanui o Waikato. I te korerotia hoki toona ingoa hei kaiwhakataetae i te turu torangapu o Hauraki Waikato ma te RTM, engari, hei taana, hei aha atu maana nga torangapu-a-motu. Kei tana tuakana, kei a Nanaia te turu o Hauraki Waikato i tenei wa.
Copyright © 2016, UMA Broadcasting Ltd: www.waateanews.com