July 11, 2016
Reo tautoko
Reo tautoko
E tika ana me mihi ake ki nga pakihi i huri ai ki te tautoko i te Wiki o te Reo Maori.
Koia te korero a Ngaahiwi Apanui toihau o te Taura Whiri i te Reo Maori.
Te ahua nei kua tiimata etahi roopu ki te hiikoi i te huarahi o te reo.
Hai taa Apanui ano he maha nga tari kaawana, nga pakihi me nga roopu haapori i karangahia to ratou hiahia ki te tautoko i te kaupapa o te reo Maori.
Tikanga huakore?
He koretake nga hootaka tikanga Maori e whakahaerehia ana mo nga mauhere.
Koia te whakapae a Judith Collins Minita Whakatika Tangata heoi ano e kii ana a kairangahau take whareherehere a Kim Workman ko te whaainga o nga hootaka mo te tikanga Maori he whakaara ake i te wairua o nga mauhere me te mea nei he momo rongoaa tera hai whakapuare i te whakaaro mauhere ki huarahi kee.
Hui Whaanau Ora
Kei te hui nga ratonga Whaanau Ora o te Ika a Maaui i Taamaki Makarau ki te whakanui i to ratou anga whakamua i nga tau e rua kua mahue ake nei.
Koia te hui tuatahi a Te Pou Matakana hai taa Awarangi Tamihere o Te Whaanau o Waipareira kua haapaingia nga hiahia o te whaanau koia te mea nui.
Hai taana ano ka korero mo nga rangahau me nga raraunga kua kohia e te katoa kia uu tonu ki te whakapono ko te whaanau te puutaketanga o te oranga Maori.
Itarere wetiweti
He aha te ahuatanga tera pea ka whakarerekeehia te maakete hoko whare?
Koia te paatai nui i Aotearoa me Ahitereiria i tenei waa.
E mea ana nga tohunga oohanga ko nga taumata itarere araa interest rates koia te ahuatanga e taea ai te whakararuraru i te tokomaha.
Te mea kee e matapae ana e kore aua taumata itarere e piki maarika i tenei tau engari a muri atu koia te wehi no etahi.
Ahitereiria hononga
Tera pea ka whai hua nga Kiwi i Ahitereiria na te whakaritenga kia tuu tonu a Malcolm Turnbull hai Piriimia mo tera whenua.
Koia te whakapae a Areti Metuamate he Maori kei reira e rangahau ana me tana mohio ki nga ture uaua i Ahitereiria.
Heoi ano hai taana ano he tohu pai te hononga tata i waenga i a John Key me Turnbull me te kii a etahi na te mahana pai o taua piringa toorangapuu ka whiti ano te raa ki runga i era o tatou kei reira e noho ana.
Maataawai
Ma te tuunga o te roopu whakarauora reo o Te Maataawai ka waiho ma tatou te herenga ki te haapai ake i nga take o te reo.
Hai taa Cathy Dewes te maangai o Te Arawa ki runga o Te Maataawai me mahue ki tahaki i a tatou nga here a te Paakeha araa ko era here kei te taarona i a tatou me to tatou ahei ki te whakarite kaupapa whai hua mo tatou.
Copyright © 2016, UMA Broadcasting Ltd: www.waateanews.com