July 13, 2016
Hui mo te wai me etahi atu kaupapa.
Hui mo te wai me etahi atu kaupapa.
Ko te wai te kaupapa matua i te hui o nga rangatira Maori me te hunga whiriwhiri whakatau a tera wiki ki Rotorua.
Ko nga kaunihera o Waikato me Toi Moana ka hautuu i te hui me te kii he momo koha te hui raka ki nga haapori Maori e tautoko ai i nga mahi kaunihera.
Ka korero mo te hauora o nga tuna i te awa o Rangitaaiki, mo te anga maatauranga Maori o te kaunihera, mo te whakatupu whenua, mo te whakahaere i te wai Maori, mo nga huarahi hoki hai whakahaere i nga rawa a iwi.
Winston Whaanau Ora.
Taaria te kitenga o nga raraunga korero ma reira ka huri pea te whakaaro mo te ahu pehea o Whaanau Ora.
Koia te korero a Winston Peters rangatira o Aotearoa Tuatahi me tana kii kaore ano ia kia rongo i nga whakautu ki ana paatai e paa ana ki te mauritau o te kaupapa.
Ki a ia he nui te puutea kei te utua ki a Whaanau Ora no reira e tika ana kia tuu pakari ahakoa nga wero e whiua atu ai ki mua i nga kaiwhakahaere.
Hauora whakamaoritanga.
Kua piki te hauora o nga kaupapa hauora i runga i te whakamaoritanga o nga tuhinga hauora a tetahi poari a rohe.
Ki taa kairangahau Bridget Robson he waahanga nga tuhinga nei o te tikanga ki te whiriwhiri i nga kaupapa utu puutea.
Hai taana ano kua tuhia ki te reo Maori nga kaupapa korero e paa ana ki nga raraunga hauora mo tatou katoa.
Iwi ora.
Whakaurua nga ringaringa ki o koutou puukoro mo Whaanau Ora.
Koia te karanga a etahi ki nga rangatira a iwi me te kii a etahi pera i a John Tamihere toihau o Te Pou Matakana kei te aronui kee nga rangatira ki nga paamu ki nga ngahere ki nga rohe hao ika he iti ake te paanga atu ki nga take paapori.
Hai taa Tamihere ano akuanei ka tuu nga kaupapa paapori raa ki mua tonu i te aroaro o nga iwi.
Clark uiuitanga.
Kei te uiuitia a Helen Clark e te Kaahui o Ao i te whakataetae kia kite ko wai ka tuu hai hekeretari matua o te roopu raa.
He uaua nga paatai kei te whiua ki a ia mo nga kaupapa taimaha o te ao pera i te hunga whakaruru, i nga pakanga, i te aha ranei.
Kaati ko Clark tetahi o te tekau maa rua taangata whakarae kei te karangahia o ratou ake painga kei te korerohia mo nga kaupapa huhua.
Manawa whawhati tata.
Kia pai ake te ahei o Maori Pasifika ki te whakapaa atu ki nga ratonga hauora mehemea ki te hiahia ki te tapahi i te maha o nga tuuroro mate manawa.
Ki etahi kairangahau mena ka whakapai ake i nga tikanga tiaki tuuroro me nga ratonga aarai ka whakatau i te puehu maauiuitanga.
Kaati e meingatia ana he wero hoki te ahua o te noho a te tini manomano.
Copyright © 2016, UMA Broadcasting Ltd: www.waateanews.com