July 14, 2016
Tikanga whakaako.
Tikanga whakaako.
Kua tae ki te waa ki te aata titiro ki nga kaiako me a ratou tikanga whakaako.
Koia te korero a etahi kairangahau Maori i runga i te whakapae mo te tiitahatanga o etahi kaiako ina whakapaa atu ratou ki o ratou tauira Maori.
Hai taa kairangahau Anton Blank ko te huarahi hai whai kia huri i te hononga o te kura maahita ki te aakonga Maori tuatahi me whakapiki i te maaramatanga o te kaiako ki nga ahuatanga Maori.
Aawhaa.
He hukarere he whatitiri he huripari pea.
Koia te matapae whaanui mo nga tohu huarere i te puku o te Ika a Maaui.
Kua patua keetia a Paraparaumu me te aakau ki te raki o Poneke.
Heoi ano ka nui te hiahia o nga pakihi eke hukarere ki te tonga kia heke te hukarere akuanei i te mea e tatari tonu ana ratou ki te hautuu tuuruhi.
Matariki.
Ka piiataata mai nga whetuu a enei raa whakataa mo te whakakapinga o te ahurei o Matariki.
Hai taa kaiwhakahaere a Anahera Higgins kua pai nga whakahaere o te ahurei tuatahi kia whakapaa atu te haapori whaanui ki te mana whenua tuarua kia whakaaturia nga puumanawa Maori.
Ka mutu ka karaka te kara o te poutaaroaroa o te Skytower penei me te aranga o Tamanuiteraa te ahua aa ka tuu tetahi konohete ki reira a te po o apopo.
Puutea tohatoha.
A tera tau neke atu i te whitu miriona taara ka tohaina e te Poari Toha Puutea o Lotto ki nga marae huri noa te motu.
Te tikanga kia utu i te kotahi hautoru o te puutea ka whiwhi ki te kookiri i to mahere ahakoa he whakahou whare, he whakatika tuanui,he whakakapi taputapu, he ako hoki me pehea e mahi i tetahi mahi.
Puukenga tuhituhi.
Tokoono nga kaituhi Maori kua uru atu ki te akoranga ono marama kia whakakoi i o ratou puukenga tuhituhi.
Ko Te Papa Tipu te iingoa o te kaupapa ma reira ka tau etahi ki te whakatutuki i te moemoeaa ki te tuhi pukapuka, ki te aha ranei.
Kaati ko etahi o te tokoono e piirangi ana ki te tuhi i o ratou whakaaro ki te reo Maori.
Rauemi hou.
Kua whakaritea he rauemi hou te tumanako kia aarai te whakamomori o nga taiohi.
He kaupapa tera hai whakakore i nga mahi whakaweti ki runga i te ipurangi aa kua tukua e te roopu hauora Maori o Te Rau Matatini.
Hai taa maangai korero a Maapihi Raharuhi he rauemi tera mo te katoa atu i nga rangatahi ka tukua ki nga whaanau ki nga hapuu ki nga marae mena ka whakapae atu ki te whakaweti ipurangi ki roto i a ratou.
Copyright © 2016, UMA Broadcasting Ltd: www.waateanews.com