July 15, 2016
Pakirehua
Pakirehua
Kua piri atu te Paati Maori ki a Reipa me nga Kaakaariki ki te whakatewhatewha i te kaupapa kaaingakore.
Ka whakahaere nga roopu e toru i tetahi pakirehua mahi tahi i waenga i a ratou whai muri te huringa tuaraa o te kaawana kia tirohia te kaupapa e te Komiti Whiriwhiri o Paaremata.
Hai taa Maarama Fox rangatira takirua o te Paati Maori e tika ana me mahi ngaatahi nga roopu toorangapuu ki te kimi i nga rongoaa waa roa.
Paanga Taiao
Mehemea ki te kino nga paanga o te tangata ki te whenua ka paakino hoki te moana me nga tauranga hao ika.
Koia te whakatuupato a te Upoko o te kamupene Maori o Moana Pacific kaatahi ano ratou ka whakahou i a ratou ano me to ratou iingoa.
Ko Aotearoa Fisheries te iingoa o mua.
Hai taa uupoko whakahaere a Carl Carrington kia kaha tatou ki te whawhai mo te oranga o te taiao na te mea kei te kite i nga paanga o te parakino ki etahi rohe moana.
Maniapoto huritau
Kei te whakanui te reo irirangi o Ngati Maniapoto i to ratou huritau 25 tau koia te roanga i whakapaahotia ai ki te iwi whaanui.
Hai taa Jacqui Taituha kaiwhakahaere o te teihana ko te hiahia kia whakapaa atu ki nga kaikorero matatau o te reo me te hunga e piirangi ana ki te mohio ki nga pewheatanga o te waa i to ratou rohe.
Koni atu i tera hai taana ano kia tuutaki i nga wero o te haangarau kia whaanui atu te marara o te reo.
Mahi tika
Kia kaha etahi atu roopu ki te whai i te tauira whakatuu whare kua haapaingia ki te Taitokerau.
Koia taa Kelvin Davis o Reipa mo te papakaainga kua tuuwheratia ki Kaitaia i raro i te mana whakahaere o te Tarahiti Korowai Trust.
Hai taa Davis he whakaritenga tino pai tera papakaainga hai oranga mo nga whaanau me te mihi ake ki a kaiwhakahaere Ricky Houghton mo tana titiro whaanui ki te kaupapa e paa ana ki te koopaka o nga whare.
Davidson tautoko tonu
Kia uu tatou ki taa tatou e whakapono ai.
Koia te karanga a te hunga kei te whakahee tonu i te hiahia ki te whakatuutuu whare ki Otuataua, Maangere rohe o Taamaki.
Hai taa Maarama Davidson o nga Kaakaariki ahakoa nga taiapa, nga aarai, nga uauatanga katoa ko ia kei te tautoko tonu i te hunga whakahee.
Hai taa Davidson ko te maataapono o te kaupapa te mea nui.
Takoha konohete
I tenei rangi kua tae atu nga kaiwhakakite puuoro ki te marae o Te Puea ki te tuku atu i te kohinga puutea o taa ratou konohete kaaingakore i te po raa.
Hai taa Rio Panapa o te roopu Sons of Zion kei te haramai tonu he taapiritanga puutea e takohatia ana ki runga ipurangi.
Hai taana ano he mahi reehia tera konohete i te pokapuu o Taamaki.
Copyright © 2016, UMA Broadcasting Ltd: www.waateanews.com