December 22, 2016
Te wiki o te reo Maori
Te wiki o te reo Maori
Kua puta te tahuhu korero mo te wiki o te reo Maori a tera tau, ara, ‘Kia ora te reo’. Hei te tekau ma tahi o Mahuru ka timata te wiki o te reo Maori. Hei taa te tahuhu rangapu o te Taura Whiri a Ngahiwi Apanui, i whiriwhirihia te kaupapa "Kia ora te Reo" na te mea, e mohiotia whanuitia ana te mihi "Kia ora" , tuarua, ko te wawata o tatou katoa kia taea e tatou te kii, kei te "ora" to tatou reo.
Nga tikanga hao ika
E tika ana kia tautoko te iwi Maori i nga tikanga hao ika o tenei whenua. Koira taa te tahuhu rangapu o Te Ohu Kaimoana a Dion Tuuta. Hei taana, kei te tino he rawa atu nga tikanga hao ika i roto i etahi atu whenua o te ao, na whai ano e korehaha haere nei etahi o nga momo ika i roto i o ratou takiwa moana, engari, na te pai o nga tikanga hao ika i roto o Aotearoa nei, kei te ora rawa atu te nuinga o nga momo ika o roto i te moana e karapoti ana i a tatou.
Kete kai ki nga whanau o Kaikohe
Kua tuari atu Te Runanganui o Ngapuhi i te waru tekau kete kai ki nga whanau o Kaikohe kia matakuikui ake ai o ratou Kirihimete. Hei taa Karen Kaka o te Runanga, no tera tau i timata ai tenei kaupapa a ratou, he maharahara no te Runanga ki te tini o nga whanau, kaore waa ratou putea hei whakatuu hakari i te wa o te kirihimete.
Tutuki a Fletchers i te 33 heketea whenua i Otuataua
Na wai te puehu i tuu, katahi ka tuu ke atu i te putanga mai o te korero, kua tutuki a Fletchers Residential te toru tekau ma toru heketea whenua i Otuataua, tata ana ki Ihumatao i Mangere, te hoko. Koira taa Pania Newton, mangai matua mo te roopu kua roa nei e whakahee ana i te hokotanga o taua whenua. Hei taana, he mea raupatu taua whenua, kotahi rau, rima tekau tau ki muri, no reira, he whenua Maori no te iwi o Te Akitai – Te Waiohua.
Don Tamihere amorangi hou o te haahi Mihingare
Kua kopoua a Don Tamihere hei amorangi hou o te haahi Mihingare ki roto o Wairau i Te Tairawhiti. Hei te marama o Paengawhawha a tera tau, ka heke iho a Pihopa Brown Turei i taua turanga. Hei taa Tamihere, e kaha ana te whakapono i roto i Te Tai Rawhiti, a, ko taa te haahi, he awhina i te iwi kia kite ratou i te maramatanga o te Karaiti.
Copyright © 2016, UMA Broadcasting Ltd: www.waateanews.com