February 02, 2017
Kura whakatuu kahui ako
Kura whakatuu kahui ako
E ono tekau oorau o nga kura o te motu kua whakatuu kahui ako i roto i o ratou hapori. Koira taa te Minita i nga take Matauranga, taa Hekia Parata. Ko te tikanga o nga kahui ako nei, he tuhono i nga kura koohungahunga, nga kura tuatahi me nga kura tuarua o tetahi hapori, kia marama tiiahoaho nei te ara matauranga hei takahi ma tena tamaiti, ma tena tamaiti. Ina kitea he whawharua i roto i taua ara matauranga, ka whangai putea te tahuhu o te matauranga hei tiriwaa i taua whawharua ra. Hei taa Parata, ina te tini o nga hua e puta ana i te whakatuunga mai o nga kahui ako.
Hui te Kahui Rangatira-a-Iwi ki Waitangi
Kei te hui te Kahui Rangatira-a-Iwi ki te Peremia i te ata nei ki roto o Waitangi. E ai ki nga korero, e rua nga kaupapa matua, tuatahi ko te mana ki te wai Maori, tuarua, ko te whakahoutanga o te Tari Tamaiti Taiohi Whanau.
Te hikoi P
Ko te ruarua noa iho o nga ratonga tautoko i te hunga e raru ana i te P, tetahi o nga take nui e whakatairangatia ana e te tira hikoi e takahi haere nei i te huarahi i te Rerenga Wairua ki Waitangi. Ko etahi o te tira kua rongo ke i nga whiu a te p, a, hei taa ratou, kaore i te pai kia wheako etahi atu i te ngau a taua taniwha.
Rahi ake nga pirihimana
Kei te whakahee tetahi o nga kaiarahi i te hapori o Kaitaia i te whakatau a te peremia a Bill English kia rahi ake nga pirihimana. Hei taa English, hei roto i nga tau e wha e tu mai nei, kotahi mano, kotahi rau, rua tekau ma rima nga kaimahi pirihimana hou ka whakatuuria, a, e waru rau o ratou ka mahi ki te mura o te ahi. Heoi, hei taa Ricki Hougton o Kaitaia, ehara tenei i te rongoaa mo nga mahi takahi ture i roto i tona hapori. Hei taana, ki te whakarahi ake i nga pirihimana, ka mate koe ki te whakarahi ake i nga whare kooti, ki te whakatuu whare herehere hou hoki. Hei taana, me hui, me hono nga pirihimana ki o ratou hapori, ma reira, ka heke nga tatauranga takahi ture.
Rautaki whakawhanake i te rohe o Shelly Bay
Kua puta te korero i te Tarahiti o Port Nicholson, kei te kokiri whakamua ratou i taa ratou rautaki whakawhanake i te rohe o Shelly Bay i Te Whanganui-a-Tara. Hei taa te toihau o te Tarahiti, a Wayne Mulligan, ahakoa nga raru kua paa ki tenei kaupapa i roto i nga tau nei, kei te kite tonu ia i te pito mata i roto i te kaupapa, a, kua korero ia ki nga uri whai paanga o te Tarahiti, kia whakaritea ai he ara whakamua.
Phil Goff ki Waititi
Kei te haere te kahika hou o Tamaki, a Phil Goff ki Hoani Waititi Marae ki te whakanui i te ra o Waitangi i tenei tau. Ko Black Slate, Katchafire, Kings me Moana & The Tribe etahi o nga roopu waiata ka whakangahau i te marea a taua ra, mo te kore utu.
Copyright © 2017, UMA Broadcasting Ltd: www.waateanews.com