February 07, 2017
Willie Jackson mo Reipa
Willie Jackson mo Reipa
Kua mokonahatia nga mangai o Reipa, i te whakahee i te hononga o Willie Jackson ki te roopu. I puta he reta i te kahui rangatahi o Reipa, e whakahee ana i te whakatau kia hono a Jackson ki a Reipa. Hei taa te Reta, kaore a Jackson e tika ana mo Reipa, na runga ano hoki i te ahua o ana korero mo te taitokaitanga, te hunga takatapui me nga kura hourua. Heoi, hei taa Jackson, ahakoa kei te whakanano a Reipa i nga kura hourua i roto i waa ratou kaupapa here, kaore ia i te maharahara ki tana kura hourua i whakatuuria ra e ia ki runga i te marae nei o Waatea. Hei taana, ka tuwhera tonu te kura, ahakoa kei roto ia i te roopu Reipa inaianei.
Raggamuffin whakamutunga
Kei te whakahaerehia te ngahau Raggamuffin whakamutunga ki te Uru o Tamaki, ara, ki Trusts Stadium hei te tekau ma waru o tenei marama. Ko Shaggy, the Wailers, Conkarah me Etana etahi o nga whetuu no tawahi e haere mai ana, tae atu hoki ki nga rongonui o konei, pera i a Six 60, House of Shem, Black Seeds me Herbs. Hei taa Etana, e rikarika ana ia ki te whakarongo ki nga roopu Raggae o tenei whenua. Hei taa nga kaiwhakahaere i a Raggamuffin, ka mahue taa ratou waiho i te ngahau nei ki tona turangawaewae ki Rotorua, hei aha te hiikawe mai ki Tamaki.
Te raru P
No te Kawanatanga te hee e raru nui nei te iwi Maori i te taimiri P. Koira taa tetahi o nga kaiarahi i te roopu Mangaru. Hei taa Rex Timu, perehitini o nga Mangaru o Heretaunga, me whakarite rauemi ano te Kawanatanga hei patu i te ngarara P i te mata o te whenua. Kua tuku tono a Timu ki te Roopu Whakamana i te Tiriti, ko te ngako o taana tono, ko te kiriwara o te Maori ki te P tetahi tauira o te kaikiritanga.
Whakatuu whare ki Point England
Kua tahuri tetahi o nga mangai o Ngati Whatua o Orakei ki te tautoko i te hiahia o Ngati Paoa ki te whakatuu whare ki Point England i te ra whiti o Tamaki. Kei te whakahee etahi i te hiahia nei, pera i te Poari-a-rohe o Maungakiekie-Tamaki, na te mea, ka whakatuuria era whare ki runga whenua taapui i taua hapori. Heoi, hei taa Ngarimu Blair o Ngati Whatua Orakei, kei te tino pirangitia he whare hou ki te rohe o Pt England. E ai ki nga korero, kei te whakatuu marae hou hoki a Ngati Paoa ki runga i taua whenua.
Pukapuka hou mo te Tiriti
Koia tetahi o nga roia Tiriti a te Karauna i nga wa o mua, engari, kei te rere te heitara i a ia, kaore te Karauna i ata whakatutuki i etahi o nga whakaritenga i oti i a ia i roto i nga whakataunga raupatu a tena iwi, a tena iwi. Katahi ano ka puta i te roia nei, i a Michael Dreaver taana pukapuka hou, The Treaty on the Ground, a, hei taana, ka nui te mihi ki te ngakau whakapuke o te Minita i nga take Tiriti, ara, o Christopher Finlayson, engari, he kuurakuraku kei te pupuu ake. Hei taa Dreaver, ko te whakataunga a Te Kawerau a Maki raua ko Ngati Whatua o Kaipara tetahi o nga tauira o nga kuurakuraku nei, ara, i tona tikanga kia hokona e aua iwi te whenua o te whare herehere o Paremoremo, wiki noa i muri i te whakataunga, kaore te Tari Whakatika Taangata i whakaae ki te hoko atu i te whenua.
Copyright © 2017, UMA Broadcasting Ltd: www.waateanews.com