February 08, 2017
Hui nga rangatira o Ngapuhi
Hui nga rangatira o Ngapuhi
Kua kitea te ngoikoretanga o nga rangatira o Ngapuhi ki te whakahaere kaupapa ki runga i nga waahi tapu o te iwi. Koira taa te kaiarahi i a Aotearoa Tuatahi, taa Winston Peters, whai muri iho i nga kuuwaawaatanga me nga hokekatanga i hua ake i te marae o Te Tii i nga ra i mua i te ra o Waitangi. Ko Peters tetahi i araihia atu i te marae, a, hei taana, i whakamaa te tokomaha o nga uri o Ngapuhi i te mahi a nga Tarahiti o te marae o Te Tii. Hei taa Peters, kua tae ki te wa e hui ai nga rangatira o Ngapuhi, ki te whakatuu tikanga riiraa mo taua marae.
Te Poari o Ngati Wai
Kua kopoua e te Poari o Ngati Wai a Kris MacDonald hei tahuhu rangapu hou ma ratou. Kua tekau tau a MacDonald e noho ana ki te Poari, a, koia tetahi i arahi i te tono raupatu a te iwi ki runga i te moutere o Aotea me te takutai moana o Te Tai Tokerau.
Te whakatau a Turei mo nga tarutaru
Tukuna ma nga taakuta te tarutaru e tohatoha hei rongoaa. Koira taa Meteria Turei, kaiarahi i Nga Kakariki. Hei taa te Minita Tuarua i nga Take Hauora, a Peter Dunne, ka kore e riro ma tona tari nga tono tarutaru hei rongoaa e hapai ake inaianei, engari, ka tukuna tera mana ki te Manatu Hauora. Hei taa Turei, ko nga taakuta nga maatanga hauora kei waenganui i o tatou hapori, no reira, ma ratou ke te tarutaru e tohatoha hei rongoaa, kaua ma te Manatu Hauora.
Nga Maori o te Haahi Katorika
Hei taa te kaitakawaenga Maori o te Haahi Katorika, he waahi nui too te Maori i roto i te anamata o te haahi. Whitu tekau mano Maori e katorika ana, a, hei taa Danny Karatea-Goddard, ko tetahi o nga mahi nui a te Maori i roto i te haahi katorika, he akoako i nga manene katorika hou ki tenei whenua ki te ahurea Maori me te hiitori o Aotearoa. Kei te whakahaerehia te hui-a-tau a nga Pihopa o te haahi Katorika i tenei wa.
Copyright © 2017, UMA Broadcasting Ltd: www.waateanews.com