February 09, 2017
Te ra o Waitangi
Te ra o Waitangi
Hei taa te kaiarahi i te roopu Mana, a Hone Harawira, ahakoa pehea, kaore e taea e te peremia o tenei whenua te ra o Waitangi ki roto o Waitangi te karo. Hei taa Harawira, kaore i pai taa te marae o Te Tii whakamanuhiri i ana tuuwaewae i tenei tau, a, koia tetahi e hiahia ana ki te hui ki nga tarahiti o te marae ki te whakatikatika i nga raruraru. I haere te peremia a Bill English ki Tamaki Makaurau i tenei tau, engari, hei taa Harawira, ko Waitangi te waahi tika mo te peremia, na te mea, koira te waahi tuatahi i waitohua ai te Tiriti.
Te whakatau a Poto Williams
Kei te hoki whakamuri ake te mangai torangapu mo Otautahi a Poto Williams o Reipa, i ana kupu taataa i a Willie Jackson. I te whakamahi a Williams i nga tuapapa kootui paapori ki te whakatoihara i te hononga o Jackson ki a Reipa. Hei taa Williams, e kawa ana te waiaro o Jackson ki nga take nui pera i te taitokaitanga, a, ko te uiuitanga Roastbusters, e toru tau ki muri, te tauira o tera waiaro kawa. Heoi, kua kohetengia a Williams e te kaiarahi i a Reipa, e Andrew Little, a, i hui ia ki a Jackson, kanohi ki te kanohi i te po apa o tenei wiki. Hei taana, i te ahua nei e houtupu ana a Jackson, a, ka nui te mihi ki aana mahi i roto i te roopu o MUMA.
Rangahau i te kaupapa Whanau Ora
E rua ira kati toru miriona taara kua whaaia e Takuta Matire Harwood kia pai ai tana rangahau, mena ra kei roto i te kaupapa Whanau Ora etahi tikanga motuhake hei awhina i te Maori ki te kaupare atu i te mate huka. Ko Mana Tu te ingoa o te rangahau, a, ka titiro hohonu ki nga ahuatanga o te noho a nga whanau Maori, mei kore e tupono ka kitea etahi tohu, he aha e tuuperepere ai te tipu o te mate huka ki waenganui i te maha o nga whanau Maori.
Copyright © 2017, UMA Broadcasting Ltd: www.waateanews.com