February 15, 2017
Ture taru rauhea
Ture taru rauhea
Kua tae ki te wa e whakakore ai tatou i nga ture taru rauhea. Koira taa te mangai mo Nga Kakariki, taa Marama Davidson. No tera wiki i hoatu ai e te Minita tuarua i nga take Hauora, e Peter Dunne, te mana tuku i te taru rauhea hei rongoaa ki te Manatu Hauora. Heoi, hei taa Davidson, me whakakore ke i nga ture taru rauhea, ture tarutaru hoki, na te mea, he tipu no te whenua, he rongoaa hoki.
Nga kura hourua
Kua eke ki te tukanga tuarima o nga kura hourua, a, hei taa te Kawanatanga, kei te whakawhaanui ake i nga kaupapa motuhake e tuu ai he kura hourua. Mena e hiahia ana tetahi roopu ki te whakatuu kura hourua, me haapai ratou i nga tauira Maori, tauira rawa kore, tauira whai ora ranei i roto i waa ratou rautaki. Hei taa te kaiarahi i te roopu ACT, a David Seymour, ko te putaiao, hangarau, puukahatanga, paangarau hoki nga kaupapa ako e hiahiatia ana e te Kawanatanga hei pou mo nga kura hourua.
Turu torangapu o Te Tai Tokerau
Ka uaua. Koira te whakatau a Winston Peters mo te aranga ake ano o Hone Harawira ki te whakataetae i te turu torangapu o Te Tai Tokerau. Hei taa Peters, he atamai a Harawira, atamai ake i taa te marea e whakaaro nei, engari, ka uaua te kaahaki i te turu i nga ringa kaha o Kelvin Davis o Reipa.
Petihana hautuu waka mo nga manuhiri
Kei te tautoko te roopu Aotearoa Tuatahi i te petihana e whai ana kia whakamatautau i nga manuhiri ki tenei whenua ki te hautuu waka, i mua i te tuku i a ratou kia hautuu ki runga i o tatou huarahi. E ai ki nga korero, no nga manuhiri ki tenei whenua te hee i mate ai te rua tekau ma rima taangata i runga i o tatou huarahi i tera tau. Hei taa Winston Peters, kaiarahi i a Aotearoa Tuatahi, tokomaha rawa nga taangata o tenei whenua e mate ana i te kuaretanga o nga kaihautuu manuhiri ki nga ture huarahi.
Partnership Fund mo Ngai Tahu me te Kawanatanga
Kei te mahi tahi a Ngai Tahu me te Kawanatanga i raro i te maru o te Partnership Fund, ki te whakawhanake i nga rangatahi Maori o nga rohe tuawhenua o Te Wai Pounamu hei kaiarahi mo apopo. Hei taa te Minita i nga Take Rangatahi, a Nikki Kay, kotahi rau mano taara ka whakapaua e te Kawanatanga me Ngai Tahu i te Partnership Fund ki tenei kaupapa. Hei taa Kay, ka ako nga rangatahi i nga korero mo te hiitiri Maori, te reo Maori me nga puukenga kaiarahi.
Purongo Rautaki Whakatipu
Kua puta he purongo e hangai ana ki te Rautaki Whakatipu a te Kaunihera o Tamaki, e kii ana, me aronui te titiro ki nga huarahi whai matauranga, whai mahi hoki mo nga rangatahi Maori o te rohe. Hei taa Penny Hulse, mangai mo te purongo nei, ahakoa kei te tino angitu te tokomaha o te haurua miriona rangatahi kei Tamaki e noho ana, ara atu ano etahi e oke ana i nga raru hauora, whai matauranga, whai mahi hoki, a, ko nga rangatahi Maori te marea o era.
Nga whakaritenga mo Te Matatini
Kua tata oti i a Ngati Kahungunu nga puroku, nga whare kai, nga aha atu, nga aha atu te whakatuu, te whakarite mo Te Matatini a tera wiki. E hia mano taangata ka pooii atu ki te Hawke's Bay Regional Sports Park i Heretaunga, a, kua tae atu te mahau mo te atamira i Rotorua, kua oti hoki i nga kaiwhakairo o Kahungunu he waharoa e rima mita te teitei, te whakatuu hei raahiri i nga manuhiri. Hei taa te upoko o Ngati Kahungunu a Ngahiwi Tomoana, kei te hihiri te rohe.
Rob Thorne turanga ki te Whare Puoro o Aotearoa
Kua whai turanga te maatanga Taonga puoro ra, a Rob Thorne o Ngati Tumutumu, Hauraki me Tainui ki te Whare Puoro o Aotearoa e tuu ana ki Te Whare Wananga o Wikitoria i Te Whanganui-a-Tara. Hei taana, nona te whakamaanawa ki te noho toituu, noho motuhake ki te Whare Puoro nei mo te tau kotahi, i te mea, he kura rongonui mo te kounga o aana mahi.
Copyright © 2017, UMA Broadcasting Ltd: www.waateanews.com