February 16, 2017
Te riri o Mahuika
Te riri o Mahuika
Aio ana te poo i roto o Otautahi inapo, no reira, kaore nga kaipatu ahi i mahi nui ki te poko ahi. Hei taa Riwai Grace, kaiwhakahaere i te whawhai ki te ahi, i reira etahi wahanga o te ahi e whitawhita ake ana, e pukauri ake ana inapo, engari, i tere tonu taa nga kaipatu ahi tiineinei haere i era kia kore ai e horapa. Hei taa Grace, e tutakarerewa tonu ana nga kaipatu ahi i te ra nei, na te mea, wai ka mohio, hei ahea te riri o Mahuika kongange ake ano ai.
Nga turanga neehi o konei
E whakapataritari ana te Uepu Neehi o te Motu i te rautaki e tahuri ai ki nga neehi o tawahi ki te whakakiikii haere i nga turanga neehi o konei. Hei taa Memo Musa o te Uepu, me kaua nga hohipera me nga ratonga hauora e wareware ki te tokomaha o nga tauira neehi Maori me nga tauira neehi uri moutere e puta ake ana i nga kura whakangungu neehi. Hei taana ano hoki, kaore nga neehi Maori me nga neehi uri moutere i te whakatairanga ake ki nga turanga ikeike i roto i nga hohipera me nga ratonga hauora o tenei whenua.
Miere ki te Tai Tokerau
Kei te totara waahi rua te hapori o Tinopai i te Tai Tokerau, ko te miere te take. Hei taa Mikaere Miru o taua hapori, kei te mahi miere a Comvita ki runga i to ratou whenua, engari, kaore a Comvita i ata rangahau i te tuatahi i mua i taa ratou waitohu kirimana kia whakamahi i taua whenua, ara, he whenua Maori ke tenei, no reira, he maha ake i te kotahi, nga uri whai paanga hei korerotanga ma Comvita.
Te tukinotanga o nga tamariki i nga tau o mua
Kaore te Kawanatanga i te paku whai whakaaro ki te whakahaere whakatewhatewha e pa ana ki te tukinotanga o nga tamariki i raro i te maru o nga tari Kawanatanga i nga tau o mua. Koira taa te kaiarahi i te RTM, a Marama Fox. Hei taana, ahakoa te arokore o te Kawanatanga i tenei wa, ka tohe tonu te RTM kia tuu te whakatewhatewha nei.
Copyright © 2017, UMA Broadcasting Ltd: www.waateanews.com