February 19, 2017
Rangahau a te roopu Colmar Brunton
Rangahau a te roopu Colmar Brunton
Kua heke a Nahinara, kua piki a Reipa. Koira te ia o te rangahau a te roopu Colmar Brunton. Kei te wha tekau ma wha oorau a Nahinara, kei te toru tekau oorau a Reipa. Toru tekau ma whitu oorau o te hunga i rangahaua, e kii ana ko English te tangata tika hei peremia. e whitu oorau noa iho e tautoko ana a Andrew Little, kaiarahi i a Reipa hei peremia. Ko te korero nui o tenei rangahau, ko Aotearoa Tuatahi te roopu ka whakawahi, ka kopou i te Kawanatanga, no reira, ko te patai, ka whakatuu a Winston Peters i a wai hei Kawanatanga, a Nahinara, a Reipa ranei.
Whakatuu whare o Ngati Paoa
Kia tupato, kei ngaro nga papa reehia i roto i nga hapori o Tamaki. Koira taa te mangai torangapu mo Tamaki Makaurau taa Peeni Henare, whai muri iho i te whakatau a te Minita i nga Take Whare, a Nick Smith kia hoko atu he papa reehia ki a Ngati Paoa kia tuu ai i te iwi te toru rau whare ki runga. Hei taa Henare, kei te warea nga whakaaro o te Kawanatanga ki te whakatuu whare, hei rongoaa mo nga raru whare ki Tamaki, engari, kaore e tika ana kia mukua nga papa rehia kia tutuki ai nga hiahia mo te whakatuu whare.
Nga kaipapaho Maori
Kei te whakahaerehia he whakatewhatewha e pa ana ki te ao papaho i roto o Aotearoa nei, a, hei taa tetahi o nga mangai mo te whakatewhatewha nei, a Kay Ellmers no Ngati Tamateraa me Ngati Raukawa, ko te hiahia o te roopu whakatewhatewha kia rongo i nga whakaaro o nga kaipapaho Maori. Hei taana, e rere ana te pohehe, kia haere ki Te Mangai Paho ki te rapu putea ki te hanga hotaka papaho Maori, engari, kei a Irirangi te Motu hoki te haepapa ki te tautoko i nga hotaka Maori.
Mana Maori
Hei te ra nei ka waitohua e te RTM me Mana he whakaaetanga e mahi tahi ai nga roopu e rua hei painga mo raua ki te kowhiringa pooti i tenei tau. E ai ki nga korero, ko tetahi wahanga o te whakaaetanga nei, kia kaua te RTM e whakatuu tangata ki te turu o Te Tai Tokerau, kia watea ai a Hone Harawira o Mana ki te pakanga ki a Kelvin Davis o Reipa. Kei te whakawhaiti atu a Harawira, Te Ururoa Flavell, Marama Fox, me Tukoroirangi Morgan ki Whangaarei i te ata nei, ki te waitohu i te whakaaetanga nei.
Turu roopu Kakariki
Kei te whakatuu haere te roopu Kakariki i ona mangai ki tena turu torangapu Maori, ki tena turu torangapu Maori kia whai tonu ai ratou i tetahi wahanga nui o te pooti-a-paati i nga kaipooti Maori. Kei te tuuru o te Tai Tonga a Metiria Turei, kei te tuuru o Tamaki a Marama Davidson, ko Jack McDonald to ratou tangata ki Te Tai Hauauru, ko Godfrey Rudolf ki Te Taitokerau me Elizabeth Kerekere ki te Ikaroa Rawhiti.
Whakatuu hotera Novotel
Kua waitohu whakaaetanga a Tainui Group Holdings me te Taunga Waka Rerarangi o Tamaki kia tuu he hotera Novotel tuarua ki te taunga waka rererangi. Hei taa te upoko te taunga waka rererangi o Tamaki, a Mark Thomson, na te kaha hiahia o te marea i toko ake ai te whakaaro kia whakatuuria he hootera tuarua. Hei taa te tahuhu rangapu o Tainui Group Holdings a Chris Joblin, e pakari ana te whanaungatanga mahi i waenganui i a Tainui me te Taunga waka rererangi, koia i tutuki pai ai tenei whakaaetanga nei. Ka tapaina te hootera hou ki te ingoa ‘Te Arikinui’, hei tohu whakamaumahara ki Te Atairangikaahu.
Copyright © 2017, UMA Broadcasting Ltd: www.waateanews.com