March 06, 2017
Jacinda Ardern kaiarahi tuarua mo Reipa
Jacinda Ardern kaiarahi tuarua mo Reipa
Hei te ra nei ka kopoua a Jacinda Adern hei kaiarahi tuarua i te roopu Reipa. E toru tekau ma ono nga tau o Adern, a, no nga wiki tata nei i angitu ai ia i roto i te whakataetae kia tuu hei mangai torangapu mo te rohe o Owairaka i Tamaki. Hei taa te mangai torangapu mo te tuuru Maori o Tamaki Makaurau a Peeni Henare no Reipa, kaore e kore ka whakatumatuma a Ardern, ki te kokiri i nga take Maori, ina koa, e ngakau tuwhera ana ia ki nga take Maori.
Te pire Oranga Tamariki
Kaore te Kawanatanga i te paku aro ki nga tikanga Maori i roto i te pire Oranga Tamariki. Koinei te pire e panoni ana i te Tari Tamaiti Taiohi Whanau. Hei taa Marama Davidson o Nga Kakariki, kei te taringa morimori te Kawanatanga ki nga karanga a te iwi Maori kia whakahokia nga tamariki whakaraerae ki nga whanau, nga hapu me nga iwi kia riro ma ratou ano aa ratou tamariki whakaraerae e poipoi, e whangai.
Maina i nga onepu i te tonga o Taranaki
E rua nga iwi no te Tonga o Taranaki, ara, ko Nga Ruahine me Ngati Ruanui, i tuu ki mua i te aroaro o te hui inanahi, i whakahaerehia ai hei ata whiriwhiri i te hiahia o te Umanga Trans Tasman Resources no Ahitereiria ki te maina i nga onepuu kohuke i nga takutai o te tonga o Taranaki. Koinei te tono tuarua a Trans Tasman Resources, whai muri iho i te whakananotanga o taa ratou tono tuatahi e toru tau ki muri. Hei taa Debbie Ngarewa Packer, tahuhu rangapu o Ngati Ruanui, tino kore rawa atu nei ratou e whakaae ki tenei kaupapa.
Givealittle mo te waka o Te Matau a Maui
Kua whakatuuria he whaarangi rau koha, ara, whaarangi Givealittle hei awhina i te waka o Ngati Kahungunu, ara, i te waka o Te Matau a Maui, ki te wharau atu ki wee moana ki waho o Ahuriri, ki te whakahee i te mahi taunaha hinu a te kaipuke Amazon Princess, te kaipuke taunaha hinu nui rawa o te ao. Hei taa Tere Harrison, mangai mo te kaupapa nei, me whai nga kaumoana o te waka o Te Matau-a-Maui i te kai, i te wai Maori me era tuu-ahuatanga kia pai ai taa ratou tere atu ki moana tawhiti.
Waiho nga Toheroa
Kei te piki ano te ora o te taupori Toheroa i Te Oneroa a Tohe, engari, waiho atu ratou, kaua e kohikohi. Hei taa Steve Rudsdale, mangai mo te Manatu Ahumahi, no te tau waru tekau ma rua i raahuitia tuatahitia ai te kohinga o nga toheroa, i te mea, i te pau haere. Hei taana, ahakoa kua piki ano te maha o nga toheroa i te Oneroa-a-Tohe inaianei, ehara i te mea, kua puta te ihu ki te whai ao, ki te ao marama.
Willie Te Aho Heamana Te Putea Whakatupu
Ko Willie Te Aho te Heamana hou o te Tarahiti o Te Putea Whakatupu, ara, o te rua tekau miriona taara e tohaina ana ki nga Maori noho taone i nga rawa ika a te iwi Maori. Hei taana, ko te aronga nui o taua putea kia tautoko i te whai i te matauranga, me te whai mahi i te rangai hao ika.
Copyright © 2017, UMA Broadcasting Ltd: www.waateanews.com