March 21, 2017
Shanan Halbert mo Reipa
Shanan Halbert mo Reipa
Kua tohua e Reipa a Shanan Halbert hei mangai mo ratou ki te turu o Northcote. Kei te Minita i nga take Hauora, kei a Jonathan Coleman o Nahinara taua tuuru i tenei wa. Toru tekau ma wha nga tau o Halbert, no Rongowhakaata. Koia tetahi o nga rangatira o Te Wananga o Aotearoa ki te rohe o Tamaki me te Tai Tokerau.
Porotuu New Zealand Petroleum Conference
Kei te whakarite te hunga tiaki taiao ki te porotuu ki waho i te hui New Zealand Petroleum Conference ka tu ki Ngamotu i te ra nei. Hei taa Emily Tuhi-Ao Bailey, mangai mo te hunga tiaki taiao, ka porotuu ratou kia rongo ai te motu i nga korero mo te kino ka paa ki te taiao, i nga mahi taunaha hinu i o tatou moana, i o tatou whenua.
Taane Maori mate pukupuku
Kei te whakahaerehia he rangahau hou e pa ana ki nga taane Maori e mate ana i te mate pukupuku ki te puukoro hamuti. Toru tau te roa o te rangahau nei, aa ko te Oranga Tu te ingoa. E rima rau mano taara kei te Whare Wananga o Otakou me te Whare Wananga o Tamaki ki te whakatutuki i te rangahau nei, a, ko te whainga kia ora nga tane Maori i taua mate.
Hui ano nga neehi Maori
Kei te hui ano nga neehi Maori i whai tohu neehi i raro i te Wananga Takiura o Manukau, ki te paihere ano i te whanaungatanga i waenganui i a ratou, otira, ki te matapaki hoki e pehea ana te haere o te mahi a tena, a tena o ratou. Hei taa Evelyn Hikuroa, Upoko o te Kura Hauora / Neehi hoki o te Wananga Takiura o Manukau, ko etahi o nga neehi e tae-a-tinana mai ana ki taa ratou hui a enei rangi whakataa nei, i whai tohu i a Manukau, e toru tekau tau ki muri.
Ture Whenua Maori
Ko nga panonitanga ki te Ture Whenua Maori tetahi o nga kaupapa nui ka tiihaehaetia e Meka Whaitiri o Reipa kia mau tonu ai i a ia te turu torangapu o Te Ikaroa Rawhiti. Hei taa Whaitiri, ko te pire e pa ana ki Te Ture Whenua Maori tetahi o nga kaupapa a tona hoariri a Marama Fox o te RTM, engari, tokomaha nga taangata o te Ikaroa Rawhiti e kiriweti rawa atu ana ki taua kaupapa.
Whakahee Te Runanaga a Iwi o Ngapuhi
Kua whakahee Te Runanga a Iwi o Ngapuhi i te pire Oranga Tamariki, ara, te pire e panoni ana i te Tari Tamaiti Taiohi Whanau. Hei taa te Toihau o te Runanga, a Raniera Tau, me raweke i te pire kia nui ake ai te mana me te whai waahi o nga whanau, hapu me nga iwi ki te poipoi me te whakatipu i nga tamariki whakaraerae.
Copyright © 2017, UMA Broadcasting Ltd: www.waateanews.com