March 27, 2017
Labour Maori List
Labour Maori
E tino whakapono ana a Kelvin Davis o Reipa, ka whai turanga teitei nga Maori ki runga i te rarangi ingoa hou a Reipa. Kua heke iho a Davis, Peni Henare, Meka Whaitiri, Nanaia Mahuta, Rino Tirikatene me Adrian Rurawhe i te rarangi ingoa, a, ko to ratou tumanako, ma reira, ka piki nga Maori pera i a Willow Jean Prime, Shanan Halbert me Willie Jackson ki nga turanga ikeike i runga i te rarangi ingoa a te roopu.
Rawiri Pt England
E tohe tonu ana a Ngati Paoa, ko te papa rehia i Point England e whakahokia ana ki a ratou, he wahanga o taa ratou whakataunga tiriti. Kua puta te whakatau a Reipa, ka pooti whakahee ratou ki te opire e hoko ana i te tekau ma tahi heketea papa reehia ki a Ngati Paoa kia tuu ai te toru rau whare ki runga. Hei taa Te Hauauru Rawiri o Ngati Paoa, ko nga whare ka tuu ki runga, ka utu mama, kia taea ai e nga uri o te iwi te hoko.
Auckland sites
E hiahia ana te Kaunihera o Tamaki kia tohua, kia tawharautia nga waahi tapu o nga iwi mana whenua o te rohe. Hei taa Chris Darby o te Kaunihera, i tenei wa, e whitu tekau ma rima nga waahi tapu kua tohua e ratou ki taa ratou rautaki whakawhanake, engari, e ai ki nga korero, e rua rau, whitu tekau nga waahi tapu kaore ano kia tohua e ratou.
MOU
He hui motuhake ka tuu i te wiki nei hei whakahou i te whakaaetanga mahitahi a te kaunihera-a-rohe o Poneke, Taranaki Whaanui me Te Runanga o Toa Rangatira ki te marae o Pipitea. Ka korero raatou mo te mahere rautaki i raro i teenei whakaaetanga, ka mutu, me peehea raatou katoa, e whakatutuki ai i ngaa kaupapa nui e haangai ana ki te iwi me te kaunihera. Ko te whakawhanaketanga o te motu o Shelley me Taputeranga, eetahi o ngaa kaupapa nui kei te pae korero i tenei wa.
Poumata Kaumatua
Kua karangahia he hui e te roopuu Poumata Kuia Koroua o Waipareira e whai maaramatanga ai raatou ki te pire Ture Whenua a te kawanatanga. Koinei te raa e tuu ai teenei hui ki te taha o te minita whakawhanake Maori me tana tira ki te marae o Hoani Waititi. E mea ana a Wimutu Te Whiu, Kaiarahi o Poumatua Kuia Koroua, ma teenei hui e tino moohio ai te hunga pakeke me peehea te tuu hei tuara mo ngaa hapu otira moo ngaa iwi.
Tupapaku Hoia
Hahua ake, Whakahokia mai ngaa kooiwi o ngaa hooia i mate i ngaa pakanga o te ao, otira, i tanumia ki nga whenua kookeeii o tarawaahi. Koira te karanga a etahi ki te Roopu Whakamana i te Tiriti. Hei taa Dick Dargaville, hooia oo mua no Te Taitokerau, e pai ana tenei karanga, engari, he whakatonu taana.
Copyright © 2017, UMA Broadcasting Ltd: www.waateanews.com