November 24, 2016
Whakahee i te mauheretanga o Taa Tangata Love
Whakahee i te mauheretanga o Taa Tangata Love
Te ahua nei, na te whakahee a te tokomaha i te mauheretanga o Taa Ngatata Love i panaia ai a Neville Baker i te turanga toihau o te Tarahiti Port Nicholson. I tu te hui tuatahi a te Tarahiti i te mauheretanga o Love inapo, a, i reira, ka panaia a Baker hei toihau, kia tuu ai a Wayne Mulligan hei toihau hou. I panaia hoki te toihau tuarua a Toa Pomare, ko Hannah Buchanan kei taua turanga inaianei. No te marama o Hereturikoka i mauheretia ai a Love mo te tahae i te toru miriona taara i te Tarahiti.
Te hunga Maori kore mahi
Me timata te Kawanatanga ki te whakangungu i te hunga kore mahi, ko te nuinga o ratou he Maori, kia whai ai ratou i nga pukenga tika hei awhina i nga hapori ka raru i nga ru whenua. Koira te karanga a Winston Peters, kaiarahi i te roopu Aotearoa Tuatahi. Hei taana, e pamamae ana tona ngakau i te tini o nga kaimahi no tawahi kua tae mai ki konei ki te whakatuu ano i te rohe o Otautahi, whai muri i te ru whenua ki reira e rima tau ki muri. Hei tana, kotahi rau, toru tekau mano uri o tenei whenua e kore mahi ana, whakangungua ratou kia riro ma ratou nga rohe ka raru i te ru whenua, e whakatuu ano.
Hunuku te hunga o Tamaki ki Rotorua
Kua whakarewahia e Destination Rotorua he kaupapa e whai whakaaro ai te hunga o Tamaki ki te hunuku ki reira noho ai. Hei taa nga mangai o Destintation Rotorua, he iti te utu mo nga whare ki Rotorua, he maha nga turanga mahi i roto i te ngahere me nga pakihi o te takiwaa, he maha hoki nga rawa-a-taiao e tau ai te wairua, pera i nga roto me te ngahere ki Whakarewarewa.
Nga korero mo Maui
Kei roto i nga korero mo Maui nga tauira hei whai ma tatou i enei ra. Koira taa te kaituhi i te pukapuka hou mo Maui, taa Tim Tipene. ko The Sun Catcher te ingoa o taana pukapuka, na Zak Waipara nga pikitia. Hei taa Tipene, ko Maui tetahi o nga tuahangata o te ao Maori, a, ina titiro koe ki aana mahi, ehara i te mahi tinihanga noa nei, engari, he maataapono kei roto hei arahi i te whanonga o te tangata.
Takuta Maori ka puta i te whare wananga o Tamaki
E rua tekau ma waru nga tauira takuta hauora Maori ka puta i te whare wananga o Tamaki i tenei tau. Hei taa Takuta Elana Curtis o te Pokapu Rangahau Hauora o Te Kupenga, ko te whakaritenga a te Whare Wananga kia motuhake te urunga o etahi Maori ki te Kura Takuta, tetahi o nga take e tokomaha nei nga taakuta hauora Maori e whakapotaetia ana i tenei tau. Hei taana ano, e tika ana kia rahi ake nga taakuta Maori, kia rite ai ki te rahinga o nga uri Maori kei tenei whenua e noho iho ana.
Copyright © 2016, UMA Broadcasting Ltd: www.waateanews.com