November 29, 2016
Karakia mo Kingi Tuheitia kei te hohipera
Karakia mo Kingi Tuheitia kei te hohipera
Kei te hohipera o Tamaki Makaurau a Kingi Tuheitia e tatari ana kia whai taakihi hou. Ko tana tama, ko Korotangi Paki te kaituku i te taakihi ki a ia, he rite hoki o raua toto. Hei taa te heketari a te Kingi, a Te Rangihiroa Whakaruru, i tona tikanga kia huarangatia te taakihi ki te Kingi a tera marama, engari, na te mauiui haere o te Kingi, i tooia mai ki te ra nei. Kei runga te kahui kaumatua o Tainui i te marae o Turangawaewae e karakia pai marire ana, kia puta ora mai te Kingi i tenei huarangatanga.
Whakapotaetia nga tauira o Ka Eke Poutama
E ai ki te tangata nana nei tetahi hotaka whakangungu rangatahi i whakatuu, ko tona hiahia kia tokomaha ake nga rangatahi Maori ki runga poari, ki runga roopu Kawanatanga. Katahi ano nga tauira tuatahi o te hotaka Ka Eke Poutama ka whakapotaetia, a, e ai ki a Travis O’Keefe o Te Whare Hukahuka, te roopu e whakahaere ana i te hotaka Ka Eke Poutama, he maha nga taangata kua puta i Te Whare Hukahuka ki nga poari-a-rohe, a-iwi hoki, a, koira te hiahia mo nga rangatahi katahi ano ka puta-a-ihu nei i te hotaka Ka Eke Poutama.
He aitua ki Columbia
Kua whakaritea e te Kawanatanga o Pariihi kia tangi okawa te whenua ra mo te toru ra e tu mai nei, whai muri iho i te matenga o te whitu tekau ma whitu taangata i te aituaatanga o tetahi waka rererangi i Columbia. I runga i taua wakarererangi te kapa poiwhana o Chapa Quinche. E ai ki nga korero tokoono nga taangata i oraiti i taua aitua.
Whakataunga tiriti a Ngati Maru
E ai ki a Ngati Maru, iwi no te raki o Taranaki, e hiahia ana ratou ki etahi o nga whenua o te Papa Atawhai hei whakaea i ta ratou whakataunga tiriti. Ko te nuinga o taua whenua e karapoti ana i te awa o Whanganui. Hei taa Anaru Marshall o Ngati Maru, kua hui ratou ki nga mangai o te Kawanatanga me nga mangai o Te Papa Atawhai ki te whakaatu atu i nga whenua e hiahia nei ratou.
Whakariterite mo nga parekura-a-taiao
Me whai waahi te iwi Maori ki nga whakariterite a te Kawanatanga mo nga parekura-a-taiao, penei i te ru whenua. Koira taa te Minita Whakawhanake Maori, taa Te Ururoa Flavell. I haere a Flavell ki Kaikoura i te ra horoi nei, otira, ki Takahanga Marae me Whale Watch Kaikoura. Hei taana, ahakoa nga pokapuu awhina i whakatuuria ai e te Kawanatanga me te Rakau Whakamaru, na te marae o Takahanga ke te nuinga o nga paarurenga o te ru whenua i manaaki, ara, ko tona waru rau taangata. Hei taa Flavell ano, i rawe te mahi a Te Puni Kokiri me Te Putahitanga, ara, te ratonga whanau ora o Te Waipounamu.
Copyright © 2016, UMA Broadcasting Ltd: www.waateanews.com