December 07, 2016
Mihi a Parata ki te peremia
Mihi a Parata ki te peremia
E mihi ana te Minita i nga take Matauranga a Hekia Parata ki te peremia, ki a John Key, moona i tautoko ake i nga kaupapa Maori pera i a Key, kei te wehe atu a Parata i te ao torangapu hei te kowhiringa pooti e tu mai nei, engari, hei taa Parata, na Key te RTM i powhiri ki te tepu a te Kawanatanga, otira, i kokiri nga whakataunga tiriti, i whakatairanga hoki te whakahoutanga o Te Ture Whenua Maori kia pai ai te whakawhanaketanga o aua whenua.
Piki ake te pakeke mo te kooti rangatahi
Hei te tau rua mano tekau ma iwa, ka haere nga taiohi tekau ma whitu nga tau, ki te kooti mo nga rangatahi, kaua ki te kooti mo nga pakeke. Kua roa nga roopu pera i a JustSpeak e akiaki ana i te Kawanatanga kia tutuki tenei panonitanga. Heoi, mena ra ka hamenetia te taiohi, tekau ma wha ki te tekau ma whitu nga tau mo nga mahi kino rawa atu, pera i te kohuru, te pawhera me te patu taikaha i te tangata, ka haere tonu taua taiohi ki mua i te aroaro o te kooti mo nga pakeke whakawaangia ai.
Panonitia te punaha whare herehere o tenei whenua
Kei te tautoko tetahi mauhere o mua, kaituhi pukapuka hoki, a Eugene Ryder, i te karanga a te Ope Whakaora kia panonitia te punaha whare herehere o tenei whenua. Kua puta he purongo i te Ope Whakaora e aronui ana ki te tokomaha e waihape atu ana ki te whare herehere, te nui o te utu ki te whakahaere i nga whare herehere, me te tatauranga e kii ana, e rima tekau ma tahi oorau o nga mauhere tekau mano o tenei whenua, he Maori. Hei taa Ryder, kua tae ki te wa e tahuri marika ai te Kawanatanga ki te whakatikatika i enei momo raru.
Tuhi reta a Solid Energy
Kua tuhi reta tumatanui a Solid Energy e kii ana, ahakoa te tangi auee, ahakoa nga inoi rawakiwaki, e kore ratou e panoni i taa ratou whakatau kia purupurua te rua waro o Pike River mo ake tonu atu. Hei taa nga rangatira o Solid Energy, e pumau ana ratou ki te whakatau, he morearea rawa te tuku taangata ki roto i te rua, a, ko te hunga e whakahee ana i a ratou, he hunga whakaaro kore. Heoi, hei taa nga whanau o te rua tekau ma iwa i mate i te parekura ki Pike River, kaore a Solid Energy i te aro ki nga rangahau e kii ana, kei te pai kia tomo ano i te maina.
Moe mai ra Mina Timutimu
Kua hinga tetahi o nga tapuhi whakawhanau tautohito o te motu, a Mina Timutimu o Te Atiawa me Ngati Mutunga. No tenei tau nei i whakawhiwhia ai a Timutimu ki te tohu huaanga o Aotearoa hei whakanui i tana toituu hei tapuhi mo neke atu i te rima tekau tau. Koia te Maori tuatahi kia noho ki te Koomiti nui o Nga Tapuhi Whakawhanau o Aotearoa. Kei te marae o Tauarau i Ruatoki ia e tangihia ana.
Korero a Turei mo Key
E ai ki te kaiarahi i te roopu Kakariki, a Metiria Turei, i hoki whakamuri nga kaupapa Maori i raro i te peremiatanga o John Key. Hei taa Turei, i aronui a John Key ki nga taake me te tautoko pakihi pera i a Sky City, tee whai whakaaro ai ki nga raru whare, te kainga koretanga me te whai mahi.
No Rotorua te waimarie
Kaore e kore ka whai te ohanga o Rotorua i te hia miriona taara i te whakakiriukatanga o te ahurei paihikara maunga o Crankworx ki reira mo te tekau tau e tu mai nei. E waru miriona taara i kuutere atu ki te hapori o Rotorua i tenei tau. Hei taa Takurua Mutu, kaiwhakahaere i te whakataetae nei, no Rotorua te waimarie.
Copyright © 2016, UMA Broadcasting Ltd: www.waateanews.com