December 14, 2016
Purongo-a-tau mo Whanau Ora
Purongo-a-tau mo Whanau Ora
E ai ki te Minita o Whanau Ora a Te Ururoa Flavell, kua tae nga purongo-a-tau a Te Pou Matakana o te Ika-a-Maui me Te Putahitanga o Te Waipounamu ki a ia, a, e ai ki aua purongo e rua, neke atu i te ono mano whanau kua awhinatia i raro i te kaupapa Whanau Ora i tenei tau. Hei taana, he tohu tenei e tanekaha ana, e whena ana te hononga o nga Ratonga Whanau Ora e rua nei ki nga hapori me nga whanau Maori, otira, he tohu o te angitu o te kaupapa Whanau Ora.
Te ra whakamutunga o te kura tuatahi o Aranui
Kotahi rau ma rima tau te kura tuatahi o Aranui e toituu ana, heoi, koinei tana ra whakamutunga mo ake tonu atu. Hei taa te Upoko o te Poari o Aranui, a Tim Baker, he ra tino pouri tenei mo ratou, ka mutu, e riri ana ratou ki te tahuhu o te Matauranga, otira, ki te Minita ki a Hekia Parata, i te whakaaro kia katia te kura, otira, i te kore awhina hoki i muri i te whakatau kia katia, tae noa mai ki tenei ra nei.
Whai Rawa te whakahou whare kanukanu
Na te angitu o te ringa pakihi o Ngati Whatua Orakei, ara o Whai Rawa, e tahuri nei te iwi ki te whakahou ake i nga whare kanukanu o ona uri, waru rau, waru tekau ma ono miriona taara te uara o nga rawa a Whai Rawa inaianei, he pikinga rua tekau ma rua oorau, a, hei taa te tahuhu rangapu a Rob Hutchinson, kua tahuri ratou ki te whakapau i tetahi wahanga o taua putea ki te whakatuu whare noho mo nga kaumatua, otira, ki te whakahou ake i nga whare o nga uri kei Orakei e noho ana.
Copyright © 2016, UMA Broadcasting Ltd: www.waateanews.com