December 15, 2016
Te whakatau a Winston Peters
Te whakatau a Winston Peters
Koretake noa iho taa Bill English whakahaere i te ohanga o tenei whenua i nga tau nei. Koira taa te kaiarahi i a Aotearoa Tuatahi, taa Winston Peters. E kii ana etahi, ko te mea pai o te whakawhiti i te peremiatanga i a John Key ki a Bill English, ka tau tonu te ohanga o tenei whenua, na te mea, ko English te Minita i nga Take Putea mo nga tau e waru. Heoi, hei taa Peters, kei te raru tonu nga take paapori, nga kura, nga huarahi, nga hohipera, nga whanau i te kore whai putea i te tahua a te Kawanatanga i enei tau nei.
Karahipi Ngarimu VC
Kua tuarihia nga karahipi Ngarimu VC e waru mo tenei tau. Ko Ana Montgomery-Neutze tetahi o nga kaiwhiwhi hei awhina i a ia ki te haere ki te School of Visual Arts i New York ki te whakaoti i tana tohu paerua. Kei te haere a Maia Wikaira o Ngati Tuwharetoa, Ngapuhi ki te Whare Wananga o Standford ki te whakaoti i tana tohu paerua i roto i nga kaupapa ture. Ko te tuatoru o nga tauira tohu paerua kia whakawhiwhia ki tetahi karahipi, ko Arena Williams o Te Aitanga a Mahaki, ko taana kaupapa, ko nga tikanga roia.
Tiaki i te aihe Maui
E tika ana kia awhina mai te Kawanatanga i a matou ki te tiaki i te aihe Maui, ara, i te popoto. Koira taa te tahuhu rangapu o te Umanga Hao Ika o Moana. Hei taa Carl Carrington, kua tahuri ratou ki te tautoko i te kaupapa tiaki popoto, i te mea, ko te tiaki i te tini a Tangaroa tetahi o nga maataapono Maori, mai iho.
Whakawhaanuihia te Kawanatanga nga kura hourua
Kei te whakawhaanuihia ake e te Kawanatanga nga kura hourua o tenei whenua. Ko te tikanga ki mohoa nei, kia hangai nga kura hourua ki nga tauira, kaore e angitu ana i roto i te punaha auraki, pera i nga tauira Maori, tauira iwi moutere, heoi, hei taa te kaiarahi i a ACT a David Seymour, inaianei, ka whakatuu kura hourua hoki e aronui ana ki te putaiao, te hangarau, te matauranga puukaha me te paangarau.
Copyright © 2016, UMA Broadcasting Ltd: www.waateanews.com