May 29, 2017
Omapere Rangihamama kei te anga whakamua
Omapere Rangihamama kei te anga whakamua
Kua whakawhiwhia te Ipu Ahuwhenua ki te paamu o Omapere Rangihamama i Kaikohe. Hei taa Sonny Tau, heamana o te Tarahiti e whakahaere ana i taua paamu, kotahi ira kati whitu miriona taara te nama e iri ana ki runga i taua paamu i te tekau tau nei, inaianei, tekau ma tahi miriona taara te uara o ana rawa. I tae atu a Abe Seymour ki te Po Whakawhiwhi Ipu Ahuwhenua i tuu ki Whangaarei i te po mere nei.
Kaore nga whanau i te whiwhi puutea
Kaore nga whanau tuakoka e whai hua i te whakapikinga o te putea ki a ratou, na te mea, ka haere ke taua putea taapiri ki te hunga no ratou nei nga whare e reehia ana e aua whanau tuakoka ra. Koira taa te kaiarahi i a Mana, taa Hone Harawira. Hei taa Harawira, katahi te tahua putea auaha kore, ko tera i panuitia mai ra e te Minita i nga take Putea e Steven Joyce i tera wiki.
He aha te hua maori o te tahua putea 2017
Hei taa te toihau o Te Pou Matakana a Merepeka Raukawa Tait, ahakoa te tekau miriona taara kua whakaritea i roto i te Tahua Putea ma Whanau Ora, e kore e pahawa i taua putea te aha, he iti rawa hoki.Hei taa Maarama Fox, kaiarahi takirua o te RTM, e ngana tonu ana raua ko Te Ururoa Flavell kia nui ake te putea ki a Whanau Ora.
He whakawhaanui anoo i Tamaki Makaurau
Kua hoko whenua ano a Ngai Tahu Property i Kerepeti, ara, i Hobsonville Point, tata ana ki tetahi atu tutanga whenua kua hokona e ratou. E rua rau whare ka whakatuuria e Ngai Tahu ki taua whenua. Kua whakaae hoki te Kawanatanga ki te tono a Ngai Tahu Property kia whakatuuria te ono rau whare ki te papa tauomaoma hoiho o Riccarton i Otautahi.
He hui mo te wai maori
Kei te whakahaere hui mo te wai Maori ki roto i Te Whanganui-a-Tara i te ra nei. Ka tae atu nga mangai Kaunihera-a-rohe ki te hui ki te korero mo te kounga o te wai, te mana o te wai me te hunga e hoko ana i te wai ki tawahi. Hei taa Kelvin Davis o Reipa, e tika ana kia pakanga tatou te iwi Maori mo te wai kia hemo ra ano.
Pehea nga ratonga aawhina whanau?
Me kakama ake nga ratonga Kawanatanga ki te raupii me te kumanu i te hunga kaainga kore. Koira te whakahau a Huri Dennis, heamana o te marae o Te Puea, te marae i manaaki i tera hunga i te takurua i tera tau.
Copyright © 2017, UMA Broadcasting Ltd: www.waateanews.com