June 18, 2017
Ko Rahui Papa te mangai hou
Ko Rahui Papa te mangai hou
Kua heke iho a Rahui Papa i tona turanga hei Upoko o te Ara Taura o Waikato Tainui kia pai ai tana whakaemi pooti e riro ai i a ia te turu torangapu o Hauraki-Waikato. I whakarewahia e Papa taana kaupapa pooti i runga i te marae o Pohara inanahi. Ko Rukumoana Schaafhausen te Upoko hou o Te Arataura. Hei te rua tekau ma whitu o tenei marama, ka whakarewahia te kaupapa pooti a te mangai mo te RTM ki te tuuru o te Tai Tonga, ara, a Mei Taare.
Ko Tauranga Moana kia Pare Hauraki
Kei te rere te whakatupato i nga iwi o Tauranga ki nga Ratonga o te hapori, ina whakapaa atu ratou ki nga iwi o Hauraki, ka tuu nga pihi o nga iwi o Tauranga, ka porotuu ratou, pau te kaha. Hei taa te Toihau o te Runanga o Ngai Te Rangi a Charlie Tawhiao, waiho tenei take ki a Ngai te Rangi me te Karauna.
Maa te maori e tautoko i te maori
Ma nga ratonga Maori nga kaupapa rongoaa i te mahi tukino i waenganui i nga whanau Maori e arahi. Koira te karanga a Te Raataa Hikairo, kaimahi hauora o Waikato Tainui.
He pukapuka oohanga maori
Kua whakaterehia he pukapuka e mohio ai te hunga whakangao putea ki nga korero whakamahuki mo te ohanga Maori. Na te Minita i nga Take Ohanga, na Simon Bridges o Ngati Maniapoto taua pukapuka i whakatere. Hei taana, tekau ma rima piriona taara te uara o te ohanga Maori i tenei wa.
Te Kura Roa, he rangahau maori hou
E whitu tau te rangahau Te Kura Roa: Whaihua e haere ana hei tohu i te uara o te reo Maori, a, hei taa nga kaituhi a Ahorangi Rawinia Higgins raua ko Ahorangi Poia Rewi, ma te rangahau nei ka mohio tatou me whakapau putea tatou ki hea e puta mai ai nga hua nui ki te whakarauoratanga o to tatou reo. I korero nga kairangahau o Te Kura Roa ki nga whanau o nga kohanga reo me Te Ataarangi mo tenei rangahau, na Nga Pae o te Maramatanga i tautoko-a-putea.
E kore rawa raatou e tuoho
Hei taa te Upoko o te Runanga o Ngai Te Rangi, a Charlie Tawhiao, e ngana ana te Karauna ki te waihanga mana moana mo nga iwi o Hauraki ki roto o Tauranga Moana. I puta ano nga iwi o Tauranga ma runga i o ratou waka ki te whanga o Tauranga i nga rangi whakataa nei, ki te whakahee i tenei mahi nanakia a te Karauna.
Copyright © 2017, UMA Broadcasting Ltd: www.waateanews.com