June 19, 2017
He hui ki Te Waipounamu mo te maori o taua takiwa
He hui ki Te Waipounamu mo te maori o taua takiwa
Hei tenei wiki whakahaerehia ai e Te Putahitanga o te Waipounamu, ara, te ratonga whanau ora o Te Wai Pounamu, he hui taumata e kitea ai nga kaupapa whanau ora kua whangahia e ratou ki te putea i tenei tau. Hei taa te tahuhu rangapu o Te Putahitanga a Helen Leahy, e toru ra te roa o te hui, a, ka tuu ki Nga Hau e Wha Marae i Otautahi. Ko te tino whainga, he whakanui i nga angituutanga o Te Putahitanga, otira, o whanau ora i roto i te tau nei.
Evolution Mining ki Te Tai Tokerau
Na te kaha whakahee a nga iwi tangata whenua me nga roopu taiao i mutu ai te whai a Evolution Mining kia keri hiriwa me te koura i Puhipuhi i te raki o Whangarei. Hei taa Evolution Mining, he umanga no Ahitereiria, kei te haere ratou ki waahi ke inaianei. E ai ki a Tim Howard o Minewatch Northland, e kore ratou e mokemoke ki taua umanga, a, e mihi ana ki nga roopu taiao me Ngati Haua i kaha nei ki te pakanga ki taua umanga.
Ko wai te mangai whakamutunga o te Paati Maori?
Hei te rua tekau ma whitu o tenei marama, ka whakarewahia te kaupapa pooti a te mangai mo te RTM ki te tuuru o te Tai Tonga, ara, a Mei Taare. Hei taa te Perehitini o te roopu, a Tuku Morgan, e rongo ana ratou i te wairua angitu.
He maha ngaa rawa o te moana o Taupo
He maha rawa nga taraute kei roto i te moana o Taupo. E mahi tahi ana Te Papa Atawhai me te Runanga o Tuwharetoa ki te whakatika i tenei raru, a, e whakaae ana ratou kia hopu te tangata i nga taraute e ono inaianei, e toru taraute noa iho te whakaritenga i nga wa o mua.
Kei te anga whakamua Te Whanau a Apanui
Kei te huarahi a Te Whanau a Apanui e whiriwhiri ana i te mana whakapumau i taa ratou tono raupatu i raro i te Tiriti o Waitangi. Hei taa te Upoko o te Runanga a Rikirangi Gage, ka tuu aa ratou hui ki Te Whanganui-a-Tara a te Taite, Otautahi a te Paraire me Kirikiriroa a te Ra Horoi. Ko te kaupapa kia mohio nga uri ki nga whakaritenga mo te tono raupatu, otira, kia tautoko ratou.
He wananga reo maori ki taawaahi
Katahi ano etahi matanga reo ka hoki mai i Poihakena. I reira ratou e whakahaere wananga reo ana i raro i te kaupapa o Te Ataarangi. Nei raa a Te Waihoroi Shortland.
Copyright © 2017, UMA Broadcasting Ltd: www.waateanews.com