June 22, 2017
He raa nui mo te reo irirangi o Te Upoko O Te Ika
He raa nui mo te reo irirangi o Te Upoko O Te Ika
Hei te ra nei ka whakanui okawa nei i te huritau toru tekau o Te Reo Irirangi Maaori o te Upoko o Te Ika. Hei taa Adrian Wagner, kaiwhakahaere o te reo irirangi o Te Upoko o te Ika, kaore e kore ka maumaharatia etahi o nga pou o te kaupapa, pera i a Erana Hemmingsen.
Ko Nick Douglas te mangai matua hou
Kei te Tarahiti o Nga Roto te pito mata kia tuu hei kaiarahi i te ao i roto i nga kaupapa tiaki i te wai Maori. Koira taa Nicki Douglas o Ngati Whakaue, tumu taiao hou o te Tarahiti. He mea whakapoapoa ia ki te Tarahiti i tTe Papa Atawhai, a, ko taana mahi matua, he tiaki i nga roto tekau ma toru i whakahokia ki a Te Arawa i te tau rua mano ma ono.
Ngaa rangatahi maori mate whakamomori
He aha te rongoaa mo te tokomaha o a tatou rangatahi ka tahuri ki te whakamomori? Koira te patai ki a Moe Milne, tautohito hauora.
Te paihana kino e uwhi haere ana
E rikarika ana te roopu FOMA ki te arahi i te pakanga ki te ngangara e kiia nei, ko te myrtle rust. Kua kitea tenei ngangara kai rakau taketake i Te Puke, Te Kuiti, Te Papai-o-ea me Te Tai Tokerau. Hei taa te Upoko o FOMA a Traci Houpapa, ki te horapa te ngangara nei, ka raru te rangi ahuwhenua, te rangi miere maanuka me te rangai ngahere. Kei te whakahaere hui a FOMA Tuwharetoa a tera wiki ki te whakarite rautaki hei patu i te ngangara nei.
He mahere rautaki hauora hou
Kua whakarewahia te rautaki hauora-a-motu, a, ko etahi o ona pou ko te whakapakari i te whanaungatanga ki te iwi Maori, ko te whakapumau i nga maataapono o Te Tiriti o Waitangi. Hei taa te Minita i nga take Hauora a Jonathan Coleman, ko te wawata, ma tenei rautaki-a-motu nei ka kaha ake te angitu o nga kaupapa hauora o tenei whenua, ka hohonu ake hoki te ahua o nga rangahau e pa ana ki nga take hauora o te wa.
Me anga whakamua a Whakaata Maori
Kia maia, kia kaha hoki ki te takahi huarahi hou. Koira te hiahia o te kaiarahi i a Mana, ara, o Hone Harawira mo te tahuhu rangapu hou o Whakaata Maori. Kua timata a Whakaata Maori ki te panui i te turanga o Paora Maxwell, e heke nei i te turanga tahuhu rangapu hei te marama o Hereturikoka. Hei taa Harawira, ko te tangata ka kopoua ki taua turanga, me mohio ki te whakakaurera i te uara o Whakaata Maori ki te katoa o te iwi Maori, me te katoa o te motu.
Copyright © 2017, UMA Broadcasting Ltd: www.waateanews.com